Në datën 11 të këtij muaji, këngëtarja Linda Halimi u bë nënë për herë të parë. Ajo solli në jetë vogëlushen Kaimana, për të cilën shprehet tepër e lumtur dhe e quan bekimin më të madh.
Megjithëse e mbajti të fshehtë shtatzëninë, Linda ka vendosur që tashmë të ndajë me ndjekësit sekretet e pritjes së ëmbël dhe periudhës pas lindjes.
Ditën e djeshme, ajo i habiti të gjithë kur tregoi format perfekte vetëm 5 ditë pas lindjes së vajzës.
“Situata aktuale…… pesë ditë pas! Isha 55 kg kur bëra testin, shkova 67 kg, tani jam 60 kg!”, shkruante Linda krahas videos ku tregonte format e saj.
Ditën e sotme, këngëtarja ka zbuluar se gjatë shtatzënisë merrej me palestër dhe do të fillojë sërish sapo të marrë veten.
“Nuk kam mbajtur dietë gjatë shtatzënisë absolutisht, kam ngrënë shëndetshëm dhe kam qenë aktive në palestër gjithë kohës, përveç muajit të 7 e më tutje. Kam ngritur pesha duke i ulur çdo muaj më pak pesha, me më shumë përsëritje të seteve. Kam ecur shumë dhe gjithë pesha e fituar nga shkuar tek barku.
Ka patur ditë kur s’kam dashur të ngrihem nga shtrati dhe ato ditë kam pushuar normalisht. Kam dëgjuar çdo nevojë të trupit tim. Në përgjithësi kam qenë me shumë energji dhe aktive.”- shkruan Linda në postim.
“Nëse nuk keni bërë ushtrime vigoroze gjatë shtatzënisë nuk do t’ju sugjeroja të filloni tani. Akoma nuk kam mundësi të ndjek ushtrimet sepse jam në shërim e siper dhe ndjehem sikur jam në qiell të 7 me bebin tim, por nga java e 3 e më tutje mendoj të filloj ushtrime të lehta dhe të rris presionin gradualisht.
Për të gjitha mamatë që më këshilluan dhe ndihmuan me mbështetjen e tyre, faleminderit pafund! Falenderoj njësoj të gjithë të tjerët për urimet e shumta, Zoti ju bekoftë të gjithëve!”- ka përfunduar këngëtarja.