Pas dorëheqjes së kryeministrit Ramush Haradinaj dhe shpalljen e datës për shpërndarjen e Kuvendit të Kosovës, ministri në detyrë i shëndetësisë Uran Ismaili ka shpeshtuar paraqitjet e tij në media nga Qendra Klinike Universitare e Kosovës.
Brenda vetëm 5 ditësh Ismaili ka mbajtur tri konferenca për media në QKUK. Temë e këtyre konferencave kanë qenë promovimi i tij, ku nuk ka munguar as angazhimi i mjekëve, shkruan Gazeta Shneta.
E para u mbajt në administratën e QKUK-së ditën e mërkurë ku së bashku me Ismaili para kamerave dolën edhe drejtori i SHSKUK-së Dr. Basri Sejdiu dhe drejtori i Kardiokirurgjisë Dr. Tefik Bekteshi. Aty u fol për implementimin e programit për trajtimin e Infarktit Akut të Miokardit brenda 120 minutave.
Të enjten Ismaili ishte në Klinikën e Kirurgjisë Torakale ku e përuroi pajisjen e VATS-it dhe një bronkoskop të cilat janë blerë para disa muajsh nga buxheti i QKUK-së. Në këtë promovim mori pjesë edhe drejtori i Klinikës së Kirurgjisë Torakale Dr. Saudin Maliqi. Madje Ismaili e përdori edhe një paraqitje të tij për ta promovuar faqen e tij zyrtare në Facebook.
Ndërkaq ditën e djeshme ministri në detyrë bashkë me një kolegë të tij ministër nga PDK, shkuan sërish në QKUK. Ismaili dhe Bedri Hamza u takuan me drejtorët e klinikave të cilëve iu premtuan se ligji për pagat do të zbatohet nga një dhjetori i këtij viti.
Ismaili shpesh është kritikuar për paraqitjet e tij të shpeshta nga QKUK, si dhe promovimin e tij në rrjetet sociale. Madje partitë opozitare e kanë quajtur QKUK-në si zyre lokale të PDK-së. /Gazeta Shneta/