Ministri i Shëndetësisë Uran Ismaili ka reaguar me një postim në Facebook për projektin “Transformimi Farmaceutik”, një ditë pasi Gazeta Shneta raportoi për dyshimet mbi këtë projekt.
Ismaili ka bërë një krahasim me gjendjen e rëndë të barnatoreve ekzistuese, dhe të hapësirave të reja të cilat janë rinovuar për t’i përshtatur barnatoreve të klinikave dhe reparteve në QKUK.
Por ministri nuk ka treguar se sa do t’i kushtojnë buxhetit këto barnatore, shkruan Gazeta Shneta.
“Për 20 vjet nuk ka pasur asnjëherë asnjë sistem të mirëfilltë se si janë menaxhuar barnat në QKUK. Barnat që janë blerë, jo gjithherë kanë arritur deri te pacienti. Për më tepër, këto janë “barnatoret” e vjetra në të cilat janë mbajtur ilaçet, pa asnjë siguri dhe asnjë kriter për ruajtjen e tyre. Prandaj është nisur “Transformimi Farmaceutik”, që përmban 14 barnatore klinike dhe rreth 90 barnatore të reparteve. Çdo barnatore do të jetë e monitoruar me sistem elektronik, kamera, barkode dhe dyer me qasje të kufizuar. Çdo ilaç i blerë do të shkojë deri te pacienti”, ka shkruar Ismaili.
Gazeta Shneta gjatë ditës se djeshme ka raportuar mbi dyshimet e ngritura mbi këtë projekt, të cilit nuk i dihet kostoja. Burime të Gazetës kanë deklaruar se menaxhmenti i QKUK-së ka urdhëruar zyrtarët e Barnatores Qendrore që të bëjnë kërkesa për inventar të barnatoreve të reja. Kjo ndodh në kohën kur depoja kryesore e Barnatores Qendrore të SHSKUK-së është në gjendje të rëndë, ku pikon uji dhe ka mykë.
Ky projekt ka nisur që nga muaji gusht i vitit të kaluar, por deri më tani asnjë barnatore nuk është hapur ende, ndonëse janë emëruar zyrtar përgjegjës të cilët paguhen për barnatoret të cilat nuk ekzistojnë. /Gazeta Shneta/