Një panel ekspertësh në Izrael kanë rekomanduar një dozë të katërt të vaksinës kundër Covid për të gjithë njerëzit mbi moshën 60-vjeçare dhe punëtorët shëndetësorë.
Ky rekomandim u mirëprit nga kryeministri Naftali Bennett, i cili tha se kjo dozë do të ndihmojë vendin të kalojë edhe një valë të mundshme nga varianti Omicron shkruan BBC, transmeton Gazeta Shneta.
“Ky është një lajm i mrekullueshëm që do të na ndihmojë të kalojmë valën Omicron që po përfshin botën,” tha Bennett.
“Qytetarët e Izraelit ishin të parët në botë që morën dozën e tretë të vaksinës Covid-19 dhe ne po vazhdojmë të jemi pionierë edhe me dozën e katërt”, shtoi kryeministri.
Sipas njoftimit nga ministria, deri më sot janë konfirmuar 341 raste me variantin Omicron.
Shkalla e përgjithshme e infeksionit është gjithashtu në rritje, me 903 raste të reja të regjistruara të martën./Gazeta Shneta/