Numri i lindjeve në tremujorin e parë në Kosovë ka kaluar shifrën prej 5 mijë fëmijëve.
Në raportin e punës për periudhën janar-mars 2018 të Shërbimit Spitalor Klinik Universitar, janë regjistruar gjithsej 5 mijë e 141 lindje. Kurse numri i foshnjave që kanë ardhur në jetë është 5 mijë e 223, pasi shumë nëna kanë lindur fëmijë binjakë, shkruan Gazeta Shneta.
Më së shumti fëmijë kanë lindur në Klinikën e Gjinekologjisë në QKUK. Aty kanë kryer lindjen 2246 nëna, ndërsa më së paku janë kryer në Spitalin e Vushtrrisë “Sheikh Zayed”. Në Spitalin e Prizrenit kanë lindur 772 foshnje, në Gjakovë 458, në Gjilan 444, në Mitrovicë 355, në Ferizaj 322 dhe në Spitalin e Pejës 488.
Në raport është shënuar edhe numri i lindjeve me operacion cezarian. Janë 1 mijë e 521 nëna që kanë sjellë në jetë fëmijët me lindje cezariane.
Vitin e kaluar vetëm në Klinikën e Gjinekologjisë janë regjistruar 10 mijë e 161 lindje. /Gazeta Shneta/