Një studim i ri ka nxjerrë në pah se substanca të zakonshme si kafeina, alkooli, nikotina dhe kanabisi mund të ndikojnë ndryshe te simptomat e personave që jetojnë me sklerozë multiple (MS), një sëmundje kronike që prek sistemin nervor qendror.
Sipas hulumtimit të publikuar së fundmi në revistën “Archives of Physical Medicine and Rehabilitation”, përdorimi i kafeinës u lidh me ulje të lodhjes, një nga simptomat më të zakonshme dhe më të vështira për pacientët me MS.
Megjithatë, studiuesit vunë re se konsumimi i kafeinës mund të rrisë nivelin e stresit.
Në anën tjetër, përdorimi i nikotinës dhe kanabisit u shoqërua me rritje të lodhjes.
Kanabisi, megjithatë, tregoi edhe disa efekte pozitive në lehtësimin e dhimbjes, ndonëse studiuesit paralajmërojnë se efektet mund të ndryshojnë nga personi në person.
Sa i përket alkoolit, studimi sugjeron se ai mund të ndihmojë në uljen e stresit afatshkurtër, por njëkohësisht mund të shtojë ndjenjën e lodhjes te pacientët me sklerozë multiple.
Hulumtimi u realizua përmes monitorimit të përditshëm të 258 personave me MS, të cilët raportuan simptomat dhe përdorimin e substancave disa herë në ditë për një periudhë dyjavore.
Studiuesit thanë se rezultatet tregojnë një lidhje të ndërlikuar mes simptomave të sëmundjes dhe mënyrës se si pacientët përdorin substanca të ndryshme për menaxhimin e tyre.
Ekspertët theksojnë se pacientët nuk duhet të ndryshojnë zakonet apo trajtimin pa konsultim me mjekun, pasi efektet mund të jenë të ndryshme në varësi të gjendjes shëndetësore dhe terapive që përdoren.