Presioni i lartë i gjakut është një gjendje e përhapur që lidhet ngushtë me rritjen e rrezikut për zhvillimin e demencës, një sëmundje që prek funksionet njohëse dhe kujtesën.
Për këtë arsye, studiuesit po kërkojnë vazhdimisht mënyra të reja për të ulur rrezikun e demencës, veçanërisht te personat që vuajnë nga hipertensioni, shkruan Medical News Today përcjell Gazeta Shneta.
Një studim i fundit ka zbuluar se konsumimi i moderuar i kafeinës mund të ketë një efekt mbrojtës. Konkretisht, tek njerëzit me presion të lartë të gjakut, pirja e gjysmë deri në një filxhan kafeje në ditë ose konsumimi i katër deri në pesë filxhanëve çaji është shoqëruar me një rrezik më të ulët për zhvillimin e demencës.
Studimi i publikuar në revistën shkencore “Scientific Reports”, analizoi të dhënat e mbi 453,000 pjesëmarrësve, duke shqyrtuar lidhjen mes konsumit të kafeinës dhe rrezikut për demencë.
Studiuesit vëzhguan se personat me hipertension që konsumonin sasi të moderuara kafeje ose çaji kishin më pak gjasa të zhvillonin demencë krahasuar me ata që nuk i konsumonin këto pije ose i konsumonin në sasi shumë të larta.
Edhe pse mekanizmat e saktë mbeten ende për t’u sqaruar, besohet se përbërësit aktivë në kafe dhe çaj, përfshirë antioksidantët dhe vetë kafeinën, mund të ndihmojnë në mbrojtjen e trurit dhe përmirësimin e qarkullimit të gjakut.
Studiuesit theksojnë se nevojiten studime të mëtejshme për të konfirmuar këto gjetje.
Megjithatë, rezultatet sugjerojnë një strategji të thjeshtë dhe të përballueshme që mund të ndihmojë në uljen e rrezikut të demencës te personat me presion të lartë të gjakut, si pjesë e një stili jetese të shëndetshme. /Gazeta Shneta/