Një analizë e re nga komisioni i revistës “The Lancet”, për kancerin e mëlçisë paralajmëron se, pa ndërhyrje urgjente, rastet e kësaj sëmundjeje mund të dyfishohen – nga 870,000 në vitin 2022 në rreth 1.52 milionë deri në vitin 2050. Po ashtu, vdekjet pritet të rriten nga 760,000 në 1.37 milionë në vit.
Megjithatë, ekspertët theksojnë se rreth 60% e rasteve lidhen me faktorë të parandalueshëm, si hepatiti viral, konsumimi i alkoolit dhe sëmundja e mëlçisë e lidhur me obezitetin (MASLD). Kjo e fundit është bërë një nga shkaqet kryesore të kancerit të mëlçisë, veçanërisht në vendet me të ardhura të larta, ku obeziteti është në rritje.
Forma më e rëndë e kësaj sëmundjeje, e njohur si MASH, parashikohet të përbëjë rreth 11% të rasteve të reja të kancerit të mëlçisë deri në vitin 2050, shkruan Euronews Health përcjell Gazeta Shneta.
Ndërkohë që rastet e lidhura me hepatitin B dhe C mund të bien falë vaksinimit dhe trajtimeve më efektive, ato të lidhura me alkoolin dhe MASLD janë në rritje të vazhdueshme.
Ekspertët bëjnë thirrje për politika më të forta parandaluese, përfshirë vendosjen e taksave mbi pijet e ëmbla, fushata ndërgjegjësimi dhe integrimin e skriningut të mëlçisë në kujdesin rutinë për personat me diabet, obezitet dhe sëmundje kardiovaskulare.
Sipas analizës, nëse rastet e reja reduktohen me 2–5% çdo vit, mund të shmangen deri në 17 milionë raste dhe të shpëtohen rreth 15 milionë jetë deri në vitin 2050. /Gazeta Shneta/