Kanceri i testikujve është një nga format më të shërueshme të kancerit nëse zbulohet herët. Ja çfarë duhet të dini për të kontrolluar shenjat dhe trajtimin.
Kanceri i testikujve mund të jetë i rrallë, por është forma më e zakonshme e kancerit që prek meshkujt e rinj, raporton Euronews Health përcjell Gazeta Shneta.
Është gjithashtu një nga kancerët më të trajtueshëm nëse kapet herët. Shifrat tregojnë se shkalla e mbijetesës është e lartë — 95 për qind e meshkujve nën moshën 45 dhe jetojnë të paktën pesë vite pas diagnozës, sipas të dhënave evropiane.
Por për shkak se simptomat janë të pakta, shumë burra mund të mos e kuptojnë që kanë kancer testikular, gjë që çon në vonesa në diagnostikim dhe e bën trajtimin më të ndërlikuar.
Një pjesë e problemit është se “nuk ekziston një kulturë e vetëkontrollit” për shkak të “tabuve sociale”, tha Dr. Hendrik Van Poppel, urolog dhe anëtar i bordit të Shoqatës Evropiane të Urologjisë (EAU) dhe bashkëkryetar i rrjetit për pabarazitë, që drejtohet nga Organizata Evropiane e Kancerit.
Kush është në rrezik për kancer testikular?
Kanceri i testikujve prek rreth një në çdo 250 burra në Evropë dhe është kanceri më i zakonshëm te personat nën moshën 45 vjeç. Numri më i madh i diagnozave shfaqet në fund të të 20-ave dhe fillim të të 30-ave.
Disa burra janë në rrezik më të lartë për të zhvilluar këtë kancer, përfshirë ata me histori familjare të tyre, burrat me HIV ose me probleme fertiliteti, meshkujt e bardhë dhe ata me kriptorqidizëm.
Kriptorqidizmi është një gjendje ku testikujt nuk zbresin në skrotum, siç ndodh zakonisht rreth kohës së lindjes së një djali. Rreth 5 deri në 10 për qind e burrave me kancer testikular kanë pasur këtë gjendje, e cila mund të korrigjohet me ndërhyrje kirurgjikale që në fëmijëri.
Cilat janë shenjat e kancerit të testikujve?
Van Poppel i tha Euronews Health se meshkujt e rinj dhe adoleshentët duhet të bëjnë vetëkontroll gjatë një dushi ose vaska të ngrohtë, kur skrotumi është i relaksuar. Kontrolloni çdo testikul veçmas për gunga ose ndryshime.
Sipas EAU-së, shumica e ndryshimeve që mund të zbuloni gjatë vetëkontrollit nuk janë kancer. Por nëse gjeni një gungë të vogël dhe pa dhimbje në testikul, ajo mund të jetë serioze, prandaj duhet të shkoni te mjeku.
Shenja të tjera paralajmëruese përfshijnë: zmadhimi ose dhimbja e një testikuli, ndjesia e fortë, e rëndë ose e dhembshme në skrotum, sipas Shërbimit Kombëtar Shëndetësor të Mbretërisë së Bashkuar (NHS).
Dhimbje në shpinë ose në pjesën e poshtme të barkut, humbje në peshë, kollë, vështirësi në frymëmarrje ose gëlltitje dhe dhembje në gjoks, gjithashtu mund të jenë simptoma të kancerit. /Gazeta Shneta/