Kandidatët e rinj të barnave mund të “demaskojnë” qelizat e infektuara me HIV që shmangin sistemin imunitar.
Studiuesit kanë identifikuar kandidatë të rinj për barna që mund të jenë në gjendje të parandalojnë qelizat e infektuara me HIV që t’i shpëtojnë zbulimit nga sistemi imunitar, shkruan Euronews përcjell Gazeta Shneta.
Një ekip nga Shkolla e Mjekësisë e Universitetit të Pittsburgh në SHBA bëri zbulimin.
Terapia aktuale, e quajtur terapi antiretrovirale, parandalon shumëfishimin e HIV-it, gjë që redukton sasinë e virusit në trup në një nivel të pazbulueshëm, por nuk është një kurë.
“Ne kemi barna të shkëlqyera antiretrovirale që shtypin HIV-in, por për fat të keq, asnjë prej tyre nuk e pastron virusin. Nëse dikush me HIV ndalon së marrë mjekimin e tij, infeksioni do të rikthehet”, tha në një deklaratë Thomas Smithgall, profesor i farmakologjisë në Universitetin e Pitsburgut dhe një nga autorët e studimit.
“HIV krijon një rezervuar qelizash të infektuara që qëndrojnë të fjetura edhe në prani të terapisë antiretrovirale, duke u fshehur nga zbulimi i sistemit imunitar. Ne mendojmë se kemi zbuluar një çelës për demaskimin e atij rezervuari,” shtoi ai.
Ekipi, i cili publikoi gjetjet e tij në revistën “Cell Chemical Biology”, krijoi komponime të quajtura PROTACs që mund të ndikojnë në proteinën Nef ( Faktorin Rregullator Negativ) i cili luan një rol kyç në infeksionin HIV.
Nef ndihmon qelizat e infektuara me HIV të shmangin zbulimin duke manipuluar shenjat në sipërfaqen e këtyre qelizave, duke i bërë ato të padukshme për sistemin imunitar.
Proteinat Nef janë gjithashtu të lidhura me një imunodefiçencë të shtuar dhe replikimin e virusit brenda organizmit.
“Një proteinë si Nef shpesh konsiderohet e papërshtatshme sepse nuk ka një vend të përcaktuar lidhës për veprimin e barit,” tha në një deklaratë Lori Emert-Sedlak, një profesoreshë e asociuar në Universitetin e Pitsburgut dhe autore kryesore e studimit.
“Inhibitorët tanë ekzistues, të cilët lidhen vetëm me Nef-in, bllokojnë jashtëzakonisht mirë disa funksione të Nef-it, por nuk prekin funksione të tjera, shumë prej të cilave janë kritike për infeksionin HIV”.
Studiuesit paralajmëruan, megjithatë, se ka shumë hapa të rëndësishëm që kërkohen përpara provave klinike të mundshme. /Gazeta Shneta/