Klinika e Kardiokirurgjisë me Kardiologji Invazive në QKUK ka vdekshmërinë e pacientëve mbi 16 për qind gjatë vitit 2018. Kjo përqindje është më e larta nga të gjitha klinikat e QKUK-së
Ministria e Shëndetësisë ka publikuar raportet me statistika të ndryshme të klinikave të QKUK-së dhe spitaleve të përgjithshme. Në këto raporte përfshihen edhe numri i operacioneve, numri i vdekjeve të pacientëve si dhe mortaliteti spitalor i llogaritur me promil.
Në raportin për vitin e kaluar, Klinika e Kardiokirurgjisë me Kardiologji Invazive del të jetë klinika ku kanë vdekur më së shumti pacientë. Sipas këtij raporti, në këtë klinikë janë kryer gjithsej 100 operacione gjatë vitit 2018 ku prej tyre kanë vdekur 28 pacientë. Mortaliteti spitalor në raport është shënuar me 166.7 promil, që në përqindje i bie 16.67, shkruan Gazeta Shneta.
Ky raport është i publikuar në platformën “opendata.rks” dhe të plotë mund ta shihni duke klikuar KËTU.
Pas Kardiokirurgjisë vjen Klinika e Neurologjisë me 126.6 promil ose 12.66 për qind ndërsa e treta është Nefrologjia me 109.8 promil ose 10.98 për qind.
Ndërkaq sipas këtij raporti Klinika e Urologjisë, Kirurgjia e Fëmijëve, Kirurgjia Maksillofaciale, dhe Kirurgjia e Syve kanë pasur zero vdekje për vitin 2018.
Përqindje më e ulët e vdekshmërisë dy vite më parë ka qenë në Kardiokirurgji, por ka pasur më pak operacione. Në këtë klinikë janë kryer 31 operacione gjatë vitit 2017, ndërsa kanë vdekur vetëm tre pacientë. Në përqindje i bie vdekshmëria 6.82 apo 68.2 promil siç është shënuar në raport. Ndërkaq në vitin 2016 janë realizuar 106 operacione me vetëm 6 pacientë të vdekur ose 47.2 promil (4.7 për qind).
Kujtojmë se gjatë një konference të mbajtur më datën 1 prill, drejtori i Kardiokirurgjisë Dr. Tefik Bekteshi pati deklaruar se në këtë klinikë përqindja e vdekshmërisë për infarktin akut për vitin e kaluar ka qenë 3.58 për qind ndërsa te rastet elektive ka pasur vetëm një rast vdekje. /Gazeta Shneta/