Në Qendrën Klinike Universitare të Kosovës për herë të parë është vendosur një Pacemaker permanent tek një pacient.
Ky intervenim është kryer në bashkëpunim në mes të Shërbimit të Elektrostimulimit në kuadër të Klinikës së Kardiologjisë, dhe Shërbimit Klinik të Kardiokirurgjisë, shkruan Gazeta Shneta.
“Bëhet fjalë për implantimin e pajisjes hapshënuese të përhershme artificiale të zemrës (Permanent Pacemaker) përmes venës femorale, përkatësisht v. kava inferior te një pacient me indikacion absolut për të, ku edhe pas disa tentativave nuk ishte arritur qasja standarde për këtë procedurë (nga venat e ekstremiteteve të sipërme) për shkak të deformiteteve të theksuara të krahërorit, çrregullimit të raporteve anatomike mes enëve të mëdha të gjakut dhe kalueshmërisë së tyre- të verifikuara me metoda imazherike”, thuhet në njoftimin e SHSKUK-së.
Tutje thuhet se kjo përbën një qasje të pazakontë, të rrallë, por gjithsesi një zgjidhje alternative për një pacient kompleks, me indikacion vital për hapshënues artificial (pacemaker), të përshkruar edhe në literaturë.
Intervenimi u krye për herë të parë në QKUK, në një bashkëpunim të suksesshëm mes këtyre dy shërbimeve. /Gazeta Shneta/