Një shpëtim i suksesshëm në fushën e kardiologjisë është shënuar në Qendrën Klinike Universitare të Kosovës, ku një pacient 75-vjeçar ka patur fatin e një trajtimi të shpejtë dhe efektiv nga stafi mjekësor, ka njoftuar në Facebook, Shërbimi Spitalor Klinik Universitar i Kosovës.
R.M., pacienti në fjalë, u dërgua në Klinikën e Kardiologjisë në QKUK pasi pësoi një seri të sëmundjeve të rënda, përfshirë infarktin akut të miokardit, insuficiencën kardiake të avancuar, si dhe sëmundjen e sheqerit.
Pas një vlerësimi të hollësishëm nga konziliumi i mjekëve kardiologë dhe kardiokirurgë për shkak të kompleksitetit të sëmundjes, vendimi u mor për stentimin e trungut të përbashkët të arterieve koronare, duke shmangur operacionin e hapur për shkak të rrezikut të lartë për pacientin.
Trajtimi i stentimit të kryer në Klinikën e Kardiologjisë të QKUK-së rezultoi në një sukses të plotë. Kjo ndërhyrje konsiderohet një nga ndërhyrjet më të avancuara në fushën e kardiologjisë invazive dhe paraqet një arritje e rëndësishme për këtë qendër shëndetësore. Metodologjitë e përdorura janë në përputhje me standardet e kardiologjisë invazive në nivel botëror./GazetaShneta/
