Një analizë e thelluar e të dhënave të shëndetit federal, tregon se njerëzit që kanë pasur COVID-19 janë në rrezik të shtuar të zhvillimit të komplikimeve kardiovaskulare brenda muajit të parë deri në një vit pas infektimit.
Komplikime të tilla përfshijnë crregullimin e ritmeve të zemrës, inflamacionin e zemrës, mpiksjen e gjakut, goditjen në tru, sëmundjen e arterieve koronare, sulmin në zemër dhe dështimin e zemrës, shkruan MedicalxPress përcjell Gazeta Shneta.
Probleme të tilla ndodhin edhe në mesin e individëve më parë të shëndetshëm dhe atyre që kanë pasur infeksione të lehta COVID-19, sipas studimit nga Universiteti i Uashingtonit.
Hulumtimi është publikuar më 7 shkurt në revistën ‘Nature Medicine’.
“Ne donim të ndërtonim mbi kërkimet tona të kaluara mbi efektet afatgjata të COVID duke parë më nga afër se çfarë po ndodh në zemrat e njerëzve,” tha autori Dr. Ziyad Al-Aly, nga Universiteti i Uashingtonit.
“Ajo që ne po shohim është se COVID-19 mund të çojë në komplikime serioze kardiovaskulare dhe vdekje. Zemra nuk rigjenerohet ose nuk shërohet lehtë pas dëmtimit të saj. Këto janë sëmundje që do të prekin njerëzit për një jetë.”
Më shumë se 380 milionë njerëz në mbarë botën janë infektuar me virusin që nga fillimi i pandemisë.
“Rrjedhimisht, infeksionet COVID-19, deri më tani, kanë kontribuar në 15 milionë raste të reja të sëmundjeve të zemrës në mbarë botën,” tha Dr. Al-Aly.
Sëmundja kardiovaskulare – një term ombrellë që i referohet kushteve të ndryshme të zemrës, trombozës dhe goditjes në tru – është shkaku kryesor i vdekjeve në Shtetet e Bashkuara dhe në botë. Qendrat për Kontrollin dhe Parandalimin e Sëmundjeve (CDC) vlerësojnë se një në çdo katër amerikanë vdes nga sëmundjet e zemrës çdo vit.
“Qeveritë dhe sistemet shëndetësore në mbarë botën duhet të jenë të përgatitura për t’u marrë me kontributin e mundshëm të rëndësishëm të pandemisë COVID-19 në një rritje të barrës së sëmundjeve kardiovaskulare,” tha ai. /Gazeta Shneta/