Kolagjeni njihet gjerësisht për përfitimet e tij në shëndetin e lëkurës, nyjeve dhe kockave, por një studim i ri sugjeron se mund të luajë rol edhe në humbjen e peshës.
Hulumtimi, i paraqitur në Kongresin Evropian të Obezitetit dhe i publikuar në revistën shkencore “Nutrients”, ka ngritur interes të madh në fushën e ushqyerjes dhe metabolizmit.
Sipas studimit, pjesëmarrësit që konsumuan dy herë në ditë një proteinë të pasur me kolagjen humbën dyfishin e peshës krahasuar me grupin kontroll, i cili nuk përfshinte kolagjen në dietë. Rezultatet, të raportuara nga Health News sugjerojnë se ky suplement mund të ketë ndikim pozitiv në kontrollin e peshës trupore, transmeton Gazeta Shneta.
Megjithatë, ekspertët paralajmërojnë se është ende herët për të nxjerrë rezultate përfundimtare, pasi studimi kishte disa kufizime metodologjike dhe nevojiten kërkime të mëtejshme për ta konfirmuar këtë efekt në popullata më të gjera.
Një nga shpjegimet e mundshme lidhet me faktin se kolagjeni përthith ujin dhe zgjatet në stomak, duke ndihmuar në krijimin e ndjenjës së ngopjes dhe reduktimin e marrjes së kalorive. Po ashtu, është më i vështirë për t’u tretur, duke arritur në zorrën e trashë ku ushqen bakteret e dobishme të mikrobiomës. Kjo mund të ndikojë pozitivisht në metabolizëm, peshë dhe nivelin e inflamacionit.
Për më tepër, disa studiues sugjerojnë se kolagjeni mund të ketë efekt më të lartë termogjenik, duke djegur më shumë kalori krahasuar me proteina të tjera, çka e bën atë një suplement potencialisht interesant për menaxhimin e peshës. /Gazeta Shneta/