Komisioni Disiplinor në AKPM e ka larguar nga puna drejtorin e departamentit të Autorizim Marketingut, Ardian Rugovën. Ai është gjetur fajtor për disa shkelje. Gazeta ka provuar të marr versionin e tij por i njëjti deri më tani nuk është përgjigjur në adresën elektronike.
Komisioni Disiplinor në Agjencinë e Kosovës për Produkte dhe Pajisje Medicinale e ka larguar nga puna drejtorin e departamentit për Autorizim Marketing, Ardian Rugova, shkruan Gazeta Shneta.
“Nëpunësit z. Ardian Rugova, në pozitën e Drejtorit të Autorizim Marketingut i shqiptohet masa disiplinore – largimi nga shërbimi civil”, thuhet në vendimin të cilin e ka parë Gazeta.
Në këtë dokument thuhet se ekzekutimi i vendimit duhet të bëhet menjëherë dhe se ankesa kundër tij nuk e shtyn ekzekutimin.
Rugova është larguar nga puna për shkak të katër pretendimeve për shkelje të ngritura nga drejtori i AKPM-së Sejdë Tolaj.
Shkelja e parë të cilën e ka konstatuar edhe Komisioni, është se Rugova nuk i kishte kthyer përgjigje një kërkesë të Tolajt, e cila ishte kërkuar nga Sekretari i Përgjithshëm i MSh-së Naim Bardiqi, lidhur me produktet orfane.
“Mos kthimi i përgjigjes për një temë që është në kompetencat e drejtorit të Departamentit të Autorizim Marketingut Ardian Rugova konsiderohet mosrespektim, neglizhencë dhe mospërmbushje të detyrave të dhëna”, thuhet në vendimin e Komisionit Disiplinor.
Shkelja e dytë po ashtu ka të bëj me një mos përgjigje të Rugovës për Tolajn, me kërkesë të Shërbimit Spitalor Klinik dhe Universitar. Ky i fundit kishte kërkuar sqarime për produktin me Autorizim Marketing “Calciumgluconat 10%”, nëse përputhet përqindja me dozën apo ishte bërë ndonjë gabim. Për këtë çështje sipas Komisionit Disiplinor Rugova nuk kishte ofruar sqarime.
Në shkeljen e tretë Rugova është ngarkuar me papërgjegjësi për respektimin e evidentimit me foto të vijueshmërisë në punë, ku sipas vendimit ka pasur raste të shpeshta të mosprezencës në punë dhe keqpërdorim të kartelave të njëri-tjetrit. Në këtë çështje përmenden edhe katër punonjëse të cilat thuhet se kanë mashtruar me kartela të vijueshmërisë.
Në shkeljen e katërt thuhet se Rugova nuk i ka respektuar afatet ligjore për vlerësimin e dokumentacionit që ka rezultuar me vonesa në rastin e lëshimit të Autorizim Marketingut nga ana e zyrtarëve të departamentit të cilin e ka udhëhequr ai. Kjo çështje është konsideruar si mosrespektim i detyrave të punës, neglizhencë dhe mospërmbushje e detyrave të punës.
Gazeta ka tentuar të marr versionin e Rugovës në lidhje me këto pretendime dhe vendimin e Komisionit Disiplinor, por i njëjti nuk i ka kthyer përgjigje redaksisë përmes adresës elektronike. /Gazeta Shneta/