Komisioni për mbarëvajtje në punë në Qendrën Klinike Universitare nuk ka gjetur sot asnjë kardiolog në njësinë koronare. Ata po ashtu janë ankuar se janë penguar nga drejtori i Klinikës Dr. Imri Jashari. Ky i fundit e ka mohuar
Në njësinë koronare të Klinikës së Kardiologjisë ku trajtohen pacientët me sëmundje të zemrës, nuk është hasur sot asnjë kardiolog në monitorim të pacientëve, shkruan Gazeta Shneta.
Gazeta ka marr vesh nga burime brenda klinikës se tre anëtarët e Komisionit Dr. Ferat Sallahu, Dr. Enver Hasi dhe Mehdi Sokoli, kanë inspektuar sot këtë njësi rreth orës 12:00.
Sipas burimit, Komisioni nuk ka gjetur asnjë kardiolog në vendin e punës. Gazeta ka tentuar të konfirmoj zyrtarisht këtë informacion nga kryesuesi i Komisionit, por Ferat Sallahu nuk ka qenë i qasshëm.
Sipas burimeve, Komisioni e ka kontaktuar drejtorin e Klinikës Dr. Imri Jashari, i cili pasi është paraqitur në klinikë e ka kundërshtuar inspektimin duke pretenduar se ai është përgjegjës për mbarëvajtjen e punës dhe jo Komisioni.
Pas fjalosjes në mes të drejtorit Jashari dhe anëtarëve të Komisionit, këta të fundit e kanë ndërprerë inspektimin me arsyetimin se janë penguar gjatë punës së tyre.
Por Jashari e ka mohuar se ka ndodhur një gjë e tillë. Në një prononcim për Gazetën ai ka deklaruar se pretendimet e Komisionit për pengim në punë dhe mungesë të kardiologëve në klinikë, nuk janë të vërteta. /Gazeta Shneta/