Qeveria e Japonisë i ka dhuruar Kosovës një donacion të 20 pompave për shiringa dhe 10 elektrokardiograma të cilat kapin vlerën prej 810 mijë eurosh.
Këto pajisje janë dhuruar në kuadër të ndihmave për të përmirësuar sistemin shëndetësor dhe kapaciteteve mjekësore në luftën kundër Covid-19.
Sipas njoftimit të MSH-së, ministri Arben Vitia ka shprehur vlerësimin e tij të lartë për mbështetjen e vazhdueshme të popullit Japonez dhe Qeverisë së Japonisë për sektorin shëndetësor me theks të veçantë në mbështetjen gjatë pandemisë me masa mbrojtëse, ilaçe, pajisje dhe mbështetjen që pritet në të ardhmen.
Shkëlqesia e tij, Ambasadori Akira Mizutani ka deklaruar se është i kënaqur që të dorëzojë grupin e parë të pajisjeve mjekësore japoneze që ishte premtuar në marrëveshjen që ai nënshkroi shtatorin e kaluar. Ai theksoi se Japonia ka qëndruar përkrah Kosovës gjatë gjithë kohës së vështirë të Covid-19 dhe do të qëndrojë e përkushtuar për të mbështetur Kosovën në forcimin e sektorit të saj shëndetësor.
Përveç dhurimit të sotëm, pajisjet e mbetura të tilla si aparatura me ultratinguj dhe rrezet-X të lëvizshme pritet të arrijnë në Kosovë këtë verë.
Pajisjet do të shpërndahen nga sot në Qendrën Klinike Universitare të Kosovës (QKUK) dhe spitalet e tjera rajonale në të gjithë Kosovën. /Gazeta Shneta/