Dyshimet e Gazetës Shneta në lidhje me përzgjedhjen e Edona Dujakës në pozitën e shefes në Barnatoren Qendrore në QKUK, janë konfirmuar këtë javë. Dujaka është përzgjedhur zyrtarisht në pozitën e Shefes për Furnizim dhe Distribuim të Shërbimit Klinik Farmaceutik të QKUK-së
Edona Dujaka erdhi në pozitën e shefes nga pozita e menaxheres së projektit Transformimi Farmaceutik. Ky projekt ka paraparë krijimin e pozitës ku është përzgjedhur shefe Dujaka, si dhe tri pozita të tjera të nivelit të njëjtë me mbi 1 mijë euro rrogë. Kujtojmë se Duiaka është edhe person përgjegjës në një kompani private për pajisje medicinale.
Gazeta Shneta ka raportuar ditë më parë se kjo pozitë ishte rezervuar për Edona Dujakën, por SHSKUK nuk kishte pranuar të komentojë këto dyshime duke deklaruar se nuk mund të paragjykojë përzgjedhjen e kandidatëve në konkurse.
Në anën tjetër, farmacisti Visar Emini është përzgjedhur në pozitën Shef i Sektorit të Barnave dhe Infuzioneve, Erblin Elezi është përzgjedhur në pozitën Shef i Sektorit për narkotik, anestetik, antibiotik rezervë dhe citostatikë, Fatbardha Rexhaj është përzgjedhur në pozitën Shef i Sektorit për produkte jashtë listës esenciale dhe laboratorit Galen në QKUK, dhe Kujtim Parduzi është përzgjedhur në pozitën Shef i Sektorit të materialit dhe penjëve kirurgjik në QKUK.
Aktualisht Barnatorja Qendrore është bërë me dy pozita udhëheqëse dhe katër pozita të shefave të sektorëve. /Gazeta Shneta/