Komisioni Qendror i Zgjedhjeve ende nuk ka dërguar ekip mobile për t’ua mundësuar votimin pacientëve të shtrirë në Qendrën Klinike Universitare, si dhe stafit kujdestar.
Për këtë ka reaguar Shërbimi Spitalor Klinik dhe Universitar i Kosovës, duke shpreh shqetësimin se pacientëve të shtrirë në klinikat e Qendrës Klinike Universitare të Kosovës(QKUK), nuk po u mundësohet të ushtrojnë të drejtën e tyre për të votuar, transmeton Gazeta Shneta.
“ShSKUK, sipas kërkesës së KQZ, ka dorëzuar me kohë në KQZ të gjitha listat me pacientët e shtrirë në klinika dhe spitale, duke paralajmëruar KQZ-në, se shumë nga pacientët do të lirohen deri në ditën e zgjedhjeve dhe do hospitalizohen pacientë të tjerë”.
“ShSKUK kërkon nga KQZ që të ndërmarrë hapa të menjëhershëm për të mundësuar votimin e pacientëve të shtrirë në klinika dhe spitalet e përgjithshme, poshtu ta mundësojë edhe votimin e stafit shëndetësor që sot janë në vendet e tyre të punës”, thuhet në reagim.
Deri më tani nuk ka ndonjë sqarim zyrtar nga KQZ pse nuk është dërguar ekipi mobil në QKUK. /Gazeta Shneta/