Për dy pozitat e rëndësishme në SHSKUK janë gjashtë pretendentë, e në mesin e tyre edhe ushtruesit e detyrës Selami Krasniqi dhe Enver Gashi.
Selami Krasniqi dhe Enver Gashi po pretendojnë sërish të marrin dy pozita të rëndësishme në Shërbimin Spitalor Klinik dhe Universitar, shkruan Gazeta Shneta.
Krasniqi në pozitën e Shefit të Prokurimit dhe Gashi në pozitën e shefit të Financave. Dy pozita kyçe këto për të cilat ishte hapur konkursi në dhjetor të vitit të kaluar. Për këto pozita është mbajtur edhe testi me shkrim por rezultatet nuk janë publikuar ende.
Thirrja për testin me shkrim nga Zyra e Personelit të SHSKUK-së ishte publikuar më datën 27 janar, vetëm një ditë pasi kishte dhënë dorëheqje ish-ud.drejtoresha Pranvera Zejnullahu-Raçi.
Krasniqi dhe Gashi ishin përzgjedhur në këto dy pozita në kohën kur SHSKUK udhëhiqej nga ish-drejtori Basri Sejdiu dhe ministër i Shëndetësisë ishte Uran Ismaili nga PDK.
E krahas Krasniqit dhe Gashit në këtë konkurs janë edhe katër kandidatë të tjerë. Mentor Zejnullahu dhe Arsim Çitaku, janë dy kundërkandidatët në pozitën për Shef të Financave.
Çitaku poashtu është kandidat edhe për pozitën e shefit të Prokurimit, krahas Sherif Hotit dhe Gëzim Shalës.
Kujtojmë se Zejnullahu-Raçi dha dorëheqje nga pozita e ushtrueses së detyrës së drejtoreshës së SHSKUK-së më 26 janar. Në zyrën e saj ishte i angazhuar si këshilltar edhe Ekrem Çitaku, stomatolog dhe biznesmen.
Në vend të Raçit, Bordi Drejtues i SHSKUK-së e ka emëruar ud. Narqize Arenliu-Hoxha në krye të këtij institucioni. /Gazeta Shneta/