Një studim i publikuar së fundmi në revistën JACEP Open ka nxjerrë në pah krizën e thelluar të shëndetit mendor tek fëmijët dhe adoleshentët në Shtetet e Bashkuara.
Sipas të dhënave të mbledhura nga vitet 2018 deri në 2022, afërsisht 1 në 3 vizita të fëmijëve në repartet e emergjencës për çështje të shëndetit mendor, që përfunduan me shtrim apo transferim, zgjatën mbi 12 orë, ndërsa mbi 1 në 8 zgjatën më shumë se 24 orë.
Gjendja është veçanërisht alarmante pasi 70% e fëmijëve që qëndruan mbi 12 orë në emergjencë, ishin atje për mendime apo tentativa për vetëvrasje, ndërsa mbi gjysma për sjellje agresive, shkruan MedicalXpress , transmeton Gazeta Shneta.
Sipas autores kryesore të studimit, Dr. Jennifer Hoffmann, drejtoreshë e Shëndetit Mendor në Spitalin e Fëmijëve “Ann & Robert H. Lurie” në Çikago dhe profesoreshë në Universitetin Northwestern, kjo situatë tregon qartë mungesën e qasjes në kujdesin psikiatrik për fëmijët dhe adoleshentët
“Fëmijët që kanë nevojë për ndihmë të menjëhershme shpesh mbeten me orë të tëra në repartet e emergjencës, pasi nuk ka shtretër të lirë psikiatrikë.”
Një problem tjetër i theksuar në studim është se shumica dërrmuese e vizitave (99%) ndodhin në spitale për të rritur, të cilat shpesh nuk kanë kapacitetet e duhura për trajtimin e pacientëve pediatrikë me çrregullime të shëndetit mendor.
Gjithashtu, u zbulua se fëmijët me sigurim shëndetësor publik kanë më shumë gjasa të presin më gjatë për një shtrat, gjë që tregon për pabarazi në qasjen ndaj kujdesit shëndetësor.
Studimi përfshiu të dhëna që përfaqësojnë rreth 5.9 milionë vizita të fëmijëve të moshës 5–17 vjeç në repartet e emergjencës për probleme të shëndetit mendor, nga të cilat 1.4 milionë rezultuan me shtrim ose transferim./Gazeta Shneta/