Kardiologu Gani Bajraktari ka një histori me dy suspendime brenda një viti, para vendimit për përjashtim nga puna të Komisionit Disiplinor. Suspendimi i parë ishte hedhur poshtë nga Inspektorati i Punës
Para më shumë se një viti, në qershor të 2018-ës, Dr. Gani Bajraktari ishte suspenduar nga puna për tre muaj nga Komisioni Disiplinor. Ky vendim kishte ardhur pas ankesës së një familjari i cili kishte deklaruar me shkrim se Bajraktari e kishte referuar babanë e tij për në spital privat për të kryer koronarografi.
“Pas disa lutjesh nga ana jonë doktor Bajraktari tha: ‘skam çka bëjë më shumë, po e shihni si po shkon këtu puna, hajdeni në spital privat dhe unë ju bëjë një paketë ofertë për koronarografi’ duke përmendur edhe shifra të hollash”, kishte shkruar S.S. në ankesën e tij, shkruan Gazeta Shneta.
Pas disa muajsh Inspektorati i Punës e kishte kthyer në punë Bajraktarin duke konstatuar se vendimi kishte qenë i pa drejtë. Madje pas këtij vendimi të IP-së, Bajraktari kishte ushtruar padi ndaj drejtorit të Kardiologji Dr. Imri Jasharit dhe anëtarëve të Komisionit Disiplinor të SHSKUK-së, Alban Janova – kryetar, dhe anëtarëve Dr. Faton Hoxha e Dr. Shpend Haxhibeqiri.
Vendimi i Inspektoratit ishte kontestuar sërish nga SHSKUK, ndërsa vendimi për largim të përkohshëm nga puna ishte marr më 12 prill të ktij viti. Bajraktari e kishte quajtur këtë vendim si “hakmarrje” të menaxhmentit të SHSKUK-së.
“Suspendim nga puna pa Komision Displinor në Pushim Vjetor, për arsye të panjohura për mua! Kjo, le që nuk ndodh në vendet demokratike, por nuk ka ndodhur as në ato totalitare, në të cilat kemi kemi kaluar një pjesë të jetës!”, kishte shkruar Bajraktari në reagimin e tij.
SHSKUK e kishte mohuar duke thënë se nuk qëndrojnë pretendimet se kardiologu, është larguar përkohësisht nga puna për qëllime hakmarrje. “E vërteta është se ai është larguar nga puna për mos ofrim të ndihmës mjekësore, që sipas legjislacionit në fuqi klasifikohet si vepër penale”, thuhej në sqarim.
Pak muaj më vonë Bajraktari sërish do të bëhej subjekt i masave disiplinore. Ai doli në një kronikë në media ku pretendonte se ndarja e Kardiologjisë Invazive me Kardiologjinë kishte shkaktuar rritjen e numrit të pacientëve të vdekur deri në 15.5 për qind në dy vitet e fundit.
Ndaj kësaj deklarate reaguan drejtori i SHSKUK-së Dr. Basri Sejdiu dhe drejtori i Kardiologjisë Invazive Dr. Tefik Bekteshi. Të dy dolën në një konferencë për media ku mohuan përqindjen e vdekjeve të paraqitur nga Bajraktari.
Ndërkaq deklaratat e tij ishin iniciuar nga SHSKUK në Prokurorinë e Shtetit si frikësim dhe panik tek pacientët, për çka Prokuroria kishte konfirmuar hetimet për Gazetën Shneta më 23 maj.
Ndërkaq sot Komisioni Disiplinor i SHSKUK-së ka marr vendim për përjashtim nga puna të Gani Bajraktarit. “SHSKU ju konfirmon se Komisioni Disiplinor i QKUK së, pas shqyrtimit të rastit ka marrë vendim që te njejtit t’i shqiptohet masa disiplinore, ndërprerje e marrëdhënies së Punës. Rasti ishte proceduar pas ankesave të pacientëve në Klinikën e Kardiologjisë”, thuhet në përgjigjen e SHSKUK-së. /Gazeta Shneta/