Asociacioni i Gazetarëve të Kosovës (AGK) ka ndarë sot Çmimet Vjetore për Gazetari. Me këto çmime synohet të nderohen gazetarët që prodhuan storie me ndikime të larta dhe të veçanta në raportimet e tyre.
Për raportimin më të mirë mbi shëndetësi për vitin 2024, u nderua gazetari Bujar Vitija, kryeredaktor i Gazetës Shneta me hulumtimin “Jetët që shuhen ende pa filluar mirë”, të realizuar në kuadër të mediumit Kosova2.0.
Vitija përmes një analize të thelluar, ka trajtuar fenomenin shqetësues të vdekshmërisë së lartë të foshnjave në Kosovë, veçanërisht në komunitetet rom, ashkali dhe egjiptian.
Në fokus të kësaj problematike, janë shtjelluar rastet ku foshnjat kanë humbur jetën për shkak të mungesës së transportit neonatal.
Ndërkohë, autori Vitija, përmend raste dhe kur prindërit nuk kanë qenë të informuar qartë për gjendjen dhe vdekjen e foshnjave të tyre ose nuk janë trajtuar në mënyrë të barabartë në institucionet shëndetësore duke nënvizuar – këto dukuri si më të theksuara në komunitetet e margjinalizuara.
Vdekshmëria e foshnjave dhe fëmijëve në Kosovë është trefishi i mesatares së Bashkimit Evropian (BE), dhe më e larta në rajon, sipas Raportit të Komisionit Evropian (KE) për Kosovën për vitin 2023, ka shkruar Vitija.
Teksa, një faktor tjetër i analizuar në shkaqet e vdekshmërisë së foshnjave në Kosovë është edhe mungesa e kardiokirurgjisë pediatrike. Kjo vie si rezultat i mungesës së specialistëve dhe trajtimit i rasteve me keqformime të lindura në zemër, bëhet vetëm përmes misioneve humanitare të mjekëve të huaj ose atyre jashtë vendit.
Faktet dhe çështjet e ngritura në shkaqet dhe vdekshmërinë e lartë të foshnjave në Kosovë nga gazetari Vitija mund t’i lexoni duke klikuar këtu.
