Kunata e Saudin Maliqit, Myrvete Maliqi, është punësuar në Klinikën e Fiziatrisë në QKUK.
Saudin Maliqi është drejtor në Klinikën e Kirurgjisë Torakale në QKUK. Ai poashtu është i afërt i ministrit të Shëndetësisë Armend Zemaj, si dhe ka mbajtur pozitën e këshilltarit politik, shkruan Gazeta Shneta.
Maliqi është edhe kandidat për drejtor të Shërbimit Spitalor Klinik Universitar. Ai nuk është përgjigjur në pyetjet e Gazetës lidhur me punësimin e kunatës.
Por pyetjeve të Gazetës i është përgjigjur Myrvete Maliqi. Ajo ka thënë se kunati i saj nuk ka pasur asnjë ndikim në punësimin e saj.
“Po ju betohem se asnjë lidhje nuk ka pas punësimi im me kunatin. Unë kam specializuar që pesë vite dhe deri më tani nuk ka pas asnjëherë asnjë konkurs për fiziatri. Ne kemi qenë tri kandidate, dy jemi pranuar. Edhe po të përsëritej konkursi, unë prap do të merrja ato pikë që i kam marr”, ka deklaruar ajo.
Në konkursin e SHSKUK-së për specialistë janë pranuar mbi 150 mjekë të cilët deri më tani kanë qenë të papunë. /Gazeta Shneta/