Nëse pas ushqimit ndiheni sikur stomaku juaj është “i bllokuar” dhe ushqimi nuk tretet siç duhet, shkaku mund të jetë gastropareza, një çrregullim që bën që stomaku të zbrazet më ngadalë se normalisht.
Sipas Institutit Kombëtar të Shëndetësisë në SHBA (NIH), rreth një në katër persona përjetojnë simptoma të kësaj gjendjeje, të cilat përfshijnë ndjesinë e ngopjes së shpejtë, të përziera, të vjella dhe dhimbje apo parehati në bark. Para vendosjes së diagnozës, mjekët përjashtojnë shkaqe të tjera si ulcerat, inflamacionet apo bllokimet e traktit tretës.
Në shumë raste, shkaku i gastroparezës mbetet i panjohur, por shpesh lidhet me diabetin e pakontrolluar, i cili dëmton nervat që rregullojnë lëvizjen e stomakut. Gjendja mund të shkaktohet edhe nga sëmundje autoimune ose infeksione virale që prekin sistemin nervor të tretjes.
Studime të financuara nga NIH kanë treguar se dhimbja e barkut është simptomë e shpeshtë, duke prekur rreth 90 për qind të pacientëve, ndërsa një pjesë e tyre përjetojnë dhimbje të forta.
Studiuesit po hetojnë ndryshimet në nivel qelizor dhe nervor për të kuptuar më mirë sëmundjen dhe për të zhvilluar trajtime më efektive.
Ekspertët theksojnë se ndryshimet në stilin e jetesës mund të ndihmojnë ndjeshëm në menaxhimin e simptomave. Rekomandohet ngrënia e vakteve më të vogla, me pak yndyrë dhe fibra, përtypja e mirë e ushqimit, konsumimi i mjaftueshëm i lëngjeve dhe ecja pas ushqimit. Po ashtu, këshillohet shmangia e alkoolit, pijeve të gazuara dhe shtrirjes menjëherë pas ngrënies.