Kryeministri Albin Kurti ka mbajtur sot një konferencë për media pas takimit me Këshillin Kombëtar të Sigurisë.
Kurti së bashku me ministrin e Shëndetësisë Arben Vitia, iu kanë bërë thirrje qytetarëve që të mos refuzojnë vaksinën Astra Zeneca. Kurti dhe Vitia kanë pranuar se Kosova aktualisht ka më shumë vaksina Astra Zeneca në stok, sesa Pfizer, shkruan Gazeta Shneta.
“Kemi më shumë vaksina AZ sesa Pfizer. I inkurajoj qytetarët që të mos përqëndrohen vetëm tek Pfizer, sepse edhe kryeministri juaj është vaksinuar me dy doza Astra Zeneca”, ka deklaruar Kurti.
Edhe Vitia ka thënë se aktualisht në stok ka mjaftueshëm vaksina Astra Zeneca, ndërsa për Pfizer nuk ka treguar sasinë por ka lënë të kuptohet se nuk ka mjaftueshëm.
“Me AZ qëndrojmë mirë, Pfizer na sjellë cdo javë doza. Po administrojmë më shumë doza sesa që po marrim. Apeloj tek qytetarët që të mos zgjedhin vetëm vaksinën Pfizer. Të dy vaksinat janë të sigurta dhe nuk ka asnjë arsye të refuzoni vaksinën Astra Zeneca”, ka deklaruar Vitia.
Kurti dhe Vitia iu kanë bërë thirrje qytetarëve që të kenë kujdes deri në dy javë pas marrjes së dozave të vaksinave, pasi kjo është koha e mjaftueshme për fillimin e krijimit të antitrupave në organizmin e njeriut.
Poashtu është bërë thirrje për respektim të masave pasi edhe të vaksinuarit kanë mundësi të jenë shpërndarës të virusit.
Kurti ka thënë se aktualisht janë në dispozicion mbi 1600 shtretër në spitalet publike ndërsa nëse do të ketë nevojë do të futen në funksion edhe 100 shtretër të Forcës së Sigurisë së Kosovës.
Përqindja e infektimit tek të vaksinuarit gjatë muajit gusht është rreth 7.9 për qind, ndërsa deri më sot kanë ndërruar jetë 33 persona të cilët kanë qenë të vaksinuar së paku me një dozë, ndërsa 30 prej tyre kanë pasur edhe sëmundje shoqëruese. /Gazeta Shneta/