Kryeministri Albin Kurti e ka arsyetuar mungesën e sigurimeve shëndetësore duke thënë se qytetarët paguajnë pak ose fare për shërbimet shëndetësore.
Kryeministri Albin Kurti ka marr pjesë sot në ceremoninë e përurimit të punimeve për renovimin e Shërbimit Klinik Emergjent në Qendrën Klinike Universitare të Kosovës.
Në këtë ngjarje ai është pyetur edhe për mungesën e realizimit të sigurimeve shëndetësore, ndonëse kjo kishte qenë një nga premtimet e Qeverisë të cilën e drejton Kurti.
Ai e ka arsyetuar mungesën e sigurimeve duke thënë se qytetarët paguajnë pak ose fare për shërbimet shëndetësore, ndërsa sigurimet do të jenë kosto shtesë për ta.
“Ligjin për sigurime shëndetësore do ta miratojmë më së largu në dy mbledhjet e ardhshme të Qeverisë së Kosovës. Sigurimet do të kenë kosto shtesë për qytetarët. Nuk duhet harruar se për shërbimet shëndetësore paguajnë pak ose fare pak, prandaj edhe sigurimet nuk duhet parë si një lloj shkopi magjik i cili do të na parandalojë sëmundjet ose të na eliminoj ato. Mos të harrojmë se buxheti për shëndetësi krahasuar me vitin 2019 është 50 për qind më i lartë. Lista e Barnave Esenciale nga 24 milionë Euro në vitin 2024 është 60 milionë Euro. Sivjet do ta kemi të kaluar ligjin për sigurimet shëndetësore edhe në Kuvendin e Kosovës”, ka deklaruar Kurti.
Në anën tjetër ministri i Shëndetësisë Arben Vitia ka thënë se investimet në renovimet e klinikave po bëhen në kuadër të punës për funksionalizimin e sigurimeve shëndetësore.
“Qytetarëve dhe punëdhënësve nuk mund t’ju kërkosh 3.5 për qind më shumë nëse nuk ke shërbime të mira. Të gjitha këto investime janë në kuadër të punës që po e bëjmë për funksionalizimin e sigurimeve shëndetësore. Kanë përfunduar të gjitha fazat dhe është në përfundim Ligji për Sigurimet shëndetësore i cili është një ligj praktik”, ka deklaruar Vitia. /Gazeta Shneta/