Kryeministri i Kosovës Albin Kurti ka pritur sot në takim krerët e sindikatave më të mëdha në vend me të cilët ka biseduar për kërkesat e tyre.
Kërkesa e sindikalistëve, përfshirë atyre të shëndetësisë, është që Ligji për Paga të përfshihet në Projektbuxhetin e vitit 2020. Por sindikalistët nuk janë ndarë të kënaqur pas takimit pasi Kurti ua ka bërë me dije se Qeveria s’ka buxhet të mjaftueshëm për zbatimin e plotë të ligjit, shkruan Gazeta Shneta.
Por kërkesa e sindikalistëve ka qenë që ligji të përfshihet në tërësi, për çka i ishin drejtuar Kurtit edhe më herët me kërkesë publike.
Sindikata e Arsimit ka deklaruar se nëse ligji nuk zbatohet atëherë grevat në këtë sektor do të jenë të pashmangshme, ndërsa sindikalistët e shëndetësisë kanë thënë se do t’i japin kohë Qeverisë që të reflektojë.
Kryetari i FSSHK-së DR. Blerim Syla ka thënë se kanë kërkuar nga kryeministri, garanci që në projekt buxheti parashihet kostoja financiare e këtij ligji. /Gazeta Shneta/