Lagështia në sallat e operacionit në Klinikën e Ortopedisë ka ardhur si rezultat i rrjedhjes së një gypi të kanalizimit, si dhe mungesë së izolimit të ndërtesës. Këto janë detajet që ka mësuar Gazeta Shneta nga burime brenda klinikës së Ortopedisë.
Në hyrje të bllokut operativ të klinikës është vendosur letra e Inspektoratit Sanitar ku thuhet se këtij shërimi i është ndaluar përkohësisht veprimtaria. Por në fakt vetëm dy nga 4 sallat e klinikës janë jashtë veprimtarisë, shkruan Gazeta Shneta.
QKUK ka konfirmuar se këto dy salla janë jashtë funksionit aktualisht, të cilat janë ndarë me një najlon nga pjesa tjetër. Gazeta ka mësuar se lagështia në këto hapësira ka ndodhur për shkak të rrjedhjes së një gypi të kanalizimit, si dhe mungesës së izolimit.
Zyrtarët e QKUK-së kanë deklaruar se janë duke u marr me rastin dhe ekipet e mirëmbajtjes do ta sanojnë gjendjen. “Në sallat në fjalë janë paraqitur shenja të lagështisë. Ekipet e mirëmbajtjes së QKUK janë duke u marrë me sanimin e problemit. Puna në kliniken e ortopedisë dhe traumatologjisë do të vazhdoj në ditët në vijim me një intenzitet më të ulet”, thuhet në përgjigjen e QKUK-së.
QKUK nuk ka treguar se kur pritet të rikthehen në funksion të gjitha sallat dhe sa do të duhet të presin pacientët për të kryer intervenimet.
“Si rezultat i vjetërsisë se objektit ekzistues, dhe pamundësisë se evitimit përfundimtar te problemeve te lartpërmendura, QKUK ka filluar ndërtimin e aneksit te ri modern te klinikes se ortopedisë ku janë planifikuar edhe sallat moderne me hapësira përcjellëse”, thuhet në përgjigje. /Gazeta Shneta/