Larja e dhëmbëve tri herë në ditë dhe kontrollet e rregullta tek dentisti mund të ulin rrezikun për më shumë se 50 sëmundje serioze, përfshirë demencën dhe artritin, sipas ekspertëve të shëndetit oral.
Gjetjet u prezantuan në konferencën vjetore të American Association for the Advancement of Science (AAAS), e mbajtur në Arizona, SHBA, ku studiuesit theksuan lidhjen mes shëndetit të gojës dhe sëmundjeve sistemike. Alpdogan Kantarci, profesor në Shkollën e Stomatologjisë në Universitetin e Minesotës, tha se “mbajtja e dhëmbëve të shëndetshëm lidhet me një rrezik më të ulët për mbi 50 gjendje sistemike.”
Sipas tij, personat me sëmundje të lehta apo të moderuara që kujdesen rregullisht për higjienën orale dhe kryejnë pastrime profesionale tek dentisti tregojnë përgjigje më të mira njohëse krahasuar me ata që nuk e bëjnë këtë.
Ekspertët theksojnë se sëmundjet e mishrave të dhëmbëve, veçanërisht periodontiti, një formë agresive e inflamacionit, mund të rrisin rrezikun për zhvillimin e sëmundjeve si artriti reumatoid dhe demenca.
Kur bakteret nga infeksionet orale depërtojnë në qarkullimin e gjakut dhe arrijnë në tru, ato mund të shkaktojnë inflamacion kronik, duke ndikuar në formimin e pllakave në tru, të cilat lidhen me rënien e funksioneve njohëse.
Megjithatë, studiuesit sqarojnë se nuk ka prova përfundimtare që sëmundjet e mishrave të dhëmbëve shkaktojnë drejtpërdrejt demencë apo artrit, por ekziston një lidhje e fortë mes tyre.
Sipas të dhënave të Eurostat për vitin 2024, personat mbi 65 vjeç në Bashkimin Evropian raportojnë më shpesh nevoja të paplotësuara për shërbime dentare krahasuar me grupmoshat më të reja.
Një studim i vitit 2022 gjeti se Norvegjia është vendi më i kujdesshëm për shëndetin e dhëmbëve, ndërsa Serbia, Letonia dhe Polonia renditen ndër vendet me rezultatet më të dobëta.
Ndërkohë, Holanda kryeson për vizita të rregullta tek dentisti, ndërsa Portugalia, Irlanda dhe Mbretëria e Bashkuar shfaqin norma më të ulëta frekuentimi. Ekspertët theksuan se kostot e larta, listat e gjata të pritjes dhe mungesa e qasjes në shërbime konsiderohen ndër arsyet kryesore të kësaj situate.
Ata paralajmërojnë gjithashtu se dieta moderne, e pasur me ushqime ultra të përpunuara dhe sheqerna, po ndikon negativisht në shëndetin oral, edhe në vendet me qasje të mirë në kujdesin dentar.
Kantarci rekomandon larjen e dhëmbëve para gjumit dhe pas konsumimit të ushqimeve me sheqer, përdorimin e furçës elektrike dhe pastrimin e gjuhës, pasi edhe ajo mund të grumbullojë baktere.
Ai thekson se kujdesi për dhëmbët nuk është vetëm çështje estetike, por një faktor kyç për shëndetin e trurit, zemrës dhe gjithë organizmit.
“Përgjigjja është e qartë: duhet të rrisim ndërgjegjësimin për shëndetin oral si pjesë e shëndetit të përgjithshëm,” tha ai./Gazeta Shneta/