Një studim i ri i publikuar në “BMJ Mental Health”, ka analizuar të dhënat e rreth 1.5 milionë personave në Mbretërinë e Bashkuar, përfshirë afro 38 mijë me sëmundje autoimune si artriti reumatoid, sëmundja inflamatore e zorrëve dhe psoriaza.
Rezultatet tregojnë se personat me këto sëmundje kanë pothuajse dyfish më shumë gjasa të preken nga çrregullime të shëndetit mendor, shkruan burimi Euronews transmeton Gazeta Shneta.
Sipas studimit, 29% e pacientëve me sëmundje autoimune ishin diagnostikuar gjatë jetës me depresion, ankth ose çrregullim bipolar, krahasuar me vetëm 18% të popullsisë së përgjithshme. Konkretisht, 26% kishin depresion, 21% ankth dhe 1% çrregullim bipolar. Po ashtu, u vu re se këta pacientë kishin më shumë gjasa të raportonin histori familjare me probleme të shëndetit mendor.
Dallimet gjinore ishin të theksuara: 32% e grave me sëmundje autoimune përjetuan çrregullime të shëndetit mendor, kundrejt 21% të burrave.
Studiuesit sugjerojnë se faktorët hormonalë, kromozomalë dhe ndryshimet në qarkullimin e antitrupave mund të ndikojnë në këtë diferencë.
Gjetjet theksojnë lidhjen e fortë mes shëndetit fizik dhe atij mendor, duke sugjeruar që inflamacioni kronik – një tipar kyç i sëmundjeve autoimune – mund të kontribuojë në zhvillimin e problemeve psikike.
Dr. Daniel Smith nga Universiteti i Edinburgut vuri në dukje se shumë psikiatër ende nuk i konsiderojnë çrregullimet mendore si sëmundje që prekin të gjithë trupin.
Ai theksoi rëndësinë e skriningut të rregullt të shëndetit mendor te pacientët me sëmundje autoimune, veçanërisht te gratë, për të mundësuar trajtim të hershëm dhe më efektiv. /Gazeta Shneta/