Një shkresë e Kryesisë së Qendrës së Lëvizjes Vetëvendosje në Gjakovë ka shpërfaqur ndikimin e Mimoza Kusari-Lilës në emërimet e drejtorëve dhe shefave në Spitalin e Gjakovës dhe në Institutin e Mjekësisë së Punës.
Në këtë letër të publikuar nga Reporteri.net, thuhet se LVV’ja në Gjakovë i ankohen qendres së partisë së Albin Kurtit për përzgjedhjen e drejtorit të Spitalit Rajonal “Isa Grezda”.
“Dr Jeton Zarari është zgjedhur drejtor i Spitalit me mbështetjen e Mimoza Kusari Lilës (kështu thuhet nga mjekët, infermierët dhe vetë drejtori) dhe pas propozimit të dr. Jeton Vorfi (Alternativa-udhëheqës i repartit të emergjencës në Spital)”, thotë shkresa e Kryesisë së LVV’së në Gjakovë.
Madje, aty pretendohet se Vorfi duke “cituar” Kusari Lilën ka kërkuar që të hiqen nga pozitat në këtë spital edhe të dy anëtarët e Këshillit të Qendrës së Lëvizjes Vetëvendosje, Behare Alija (u.d. e drejtoreshës së Infermierëve) dhe Genc Hoxhaj (udhëheqës i radiologjisë).
“Të dy këta pas shumë presionesh dhe me aprovimin e dr. Jeton Zararit janë hequr nga pozita, njëri me shkarkim e tjetri me konkurs, ku janë zëvendësuar nga shokët e dr. Vorfit, z. Ahma i cili është eksponent i njohur i PDK’së, është zgjedhur në konkursin e fundit udhëheqës i radiologjisë dhe tjetri është zëvendësuar nga z. Pozhegu (U.d. drejtor i infermiereve) i afërm (familjarisht) i Mimoza Kusari-Lilës”.
Tutje, shkresa akuzon Mimoza Kusari-Lilës se si drejtuesja e Alternativës po bashkëpunon ngushtë për punësime me PDK’në dhe deputetin Hajdar Beqaj, duke i lënë jashtë ata të LVV’së.
Një tjetër punësim që e evidenton shkresa është edhe ai i përzgjedhjes së Albert Lilës, drejtor në Institutin e Shëndetësisë “Emin Duraku” në Gjakovë.
Lila që ka qenë edhe kandidat për deputet të Alternatives në vitin 2017, kur ishte në koalicion me LDK’në, është i afërm i Arben Lilës, burrit të Mimoza Kusari-Lilës.
“Në Gjakovë ne si qendër shihemi si të pafuqishëm politikisht dhe shpeshherë asamblistët dhe anëtarët e Kryesisë përballen me shakanë cinike që Lëvizja nuk ekziston, por duhet të ndryshohet emri i logos dhe të bëhet Lëvizja Alternative”, ankohet kryesia e LLV’së në Gjakovë.
Në këtë letër përmenden edhe emërimet në ndërmarrjet publike. Artikullin e plotë mund ta lexoni në reporteri.net.
Kujtojmë se Gazeta Shneta ditë më parë ka raportuar për emërimin e dhëndrit të Kusari-Lilës në Bordin e Ankesave në Agjencinë për Pajisje dhe Produkte Medicinale.