Maldivet kanë miratuar një ligj të ri që ndalon duhanpirjen për të gjithë personat e lindur më 1 janar 2007 dhe pas kësaj date, duke u bërë vendi i parë në botë me një ndalim të gjeneratës për përdorimin e duhanit. Ky ligj i ri zbatohet jo vetëm për vendasit, por edhe për turistët që vizitojnë ishujt tropikalë në Oqeanin Indian.
Ndalimi, i hyrë në fuqi më 1 nëntor, e bën të paligjshme për personat nën moshën e lejuar të blejnë apo të shesin produkte duhani.
Ministria e Shëndetësisë e Maldivëve e përshkroi këtë si një “moment historik në përpjekjet e vendit për të mbrojtur shëndetin publik dhe për të promovuar një brez pa duhan”, duke theksuar angazhimin e qeverisë për të mbrojtur të rinjtë nga dëmet e duhanit, raporton Euronews Health transmeton Gazeta Shneta.
Ligji i ri parashikon gjoba deri në 2,800 euro për ata që shesin duhan personave nën moshë, ndërsa shitësit duhet të verifikojnë moshën e çdo blerësi.
Personat e rinj që përdorin pajisje elektronike për duhan (vape) rrezikojnë një gjobë prej 282 euro.
Maldivet tashmë kishin kufizime të rrepta për cigaret elektronike.
Që nga viti 2024, është e ndaluar importimi, shitja, përdorimi dhe posedimi i tyre, përfshirë nga turistët. Pajisjet që gjenden në bagazhe konfiskohen në kufi, dhe udhëtarët mund t’i marrin mbrapsht vetëm në dalje.
Turistëve u lejohet të sjellin vetëm sasi të kufizuara të produkteve të duhanit: deri në 200 cigare, 25 puro ose 250 gram duhan. Çdo sasi shtesë konfiskohet dhe mund të merret përsëri në aeroportin ndërkombëtar Velana para largimit.
Sipas Ahmed Afaal, zëvendëskryetar i Bordit të Kontrollit të Duhanit, ndalimi nuk do të ndikojë negativisht në turizëm.
“Vizitorët vijnë për detin, diellin dhe ajrin e pastër, jo për të pirë duhan,” tha ai, duke shtuar se numri i turistëve madje është rritur dhe pritet të kalojë 2 milionë vitin e ardhshëm. /Gazeta Shneta/