Klinika e Anesteziologjisë, njëra nga klinikat më të mëdha në QKUK, po përballet me ngarkesë të lartë pune për shkak të rritjes së kërkesave për shërbime anesteziologjike, ndërkohë që numri i anesteziologëve është i ulët.
Drejtori i klinikës, Dr. Gazmend Spahiu, bëri të ditur se gjatë vitit të kaluar janë kryer mbi 20 mijë anestezione, një shifër që po rritet vazhdimisht që nga viti 2021, shkruan Gazeta Shneta.
“Siç e dini, gjatë pandemisë kemi pasur një rënie të madhe të numrit të anestezioneve, mirëpo prej vitit 2021 kemi vetëm rritje. Vitin e kaluar kemi kryer mbi 20 mijë anestezione, që është një punë shumë e madhe me kapacitetet që i kemi”, tha Dr. Spahiu.
Ai theksoi se aktualisht në klinikë janë vetëm 44 anesteziologë aktivë, ndërsa në vitin 2019 kanë qenë 64.
“Kemi pasur largime të stafit që nga viti 2020, përfshirë edhe pensionime. Me këtë numër kaq të vogël dhe me rritjen e vazhdueshme të kërkesës, është një punë shumë e madhe. Falë përkushtimit të kolegëve, po arrijmë të mbulojmë nevojat”, shtoi ai.
Sipas Dr. Spahiut, mungesa e stafit është sfida më e madhe aktualisht.
“Ka shumë klinika që kërkojnë asistencë nga ne, ndaj duhet të organizohemi mirë për t’u ofruar shërbime sa më shumë pacientëve”, theksoi ai.
Sa i përket pajisjeve dhe barnave, Dr. Spahiu tha se klinika është e pajisur mirë.
“Që nga viti 2020 kemi siguruar pajisjet që i kemi kërkuar, dhe sa i përket listës esenciale të barnave, rrallë kemi pasur mungesa”, u shpreh ai. /Gazeta Shneta/