Mbi katër mijë mjekë janë mbledhur dje në Frankfurt në një protestë ku kanë kërkuar kushte më të mira të punës.
Asociacioni i mjekëve gjerman ‘Marbuger Bund’ gjatë ditës së djeshme ka organizuar një grevë dhe protestë ku është bërë thirrje për kushte më të mira të punës, shkruajnë mediat gjermane, transmeton Gazeta Shneta.
Sipas asociacionit ‘Marburger’, greva është respektuar në shumicën e spitaleve bashkiake në tërë Gjermaninë dhe ky ishte vetëm një paralajmërim për qeverinë e vendit.
“Greva është respektuar në disa qindra klinika dhe rreth katër mijë mjekë iu bashkuan tubimit qendror në Romerberg në Frankfurt”, thuhet në njoftimin e asociacionit.
Kryetarja e ‘Marburger’ dr. Susanne Johna, ka kritikuar institucionet për refuzimin e tyre për negociata. “Ata që i cilësojnë kërkesat për kushte më të mira pune si ‘jo reale’ dhe ‘të ekzagjëruara’, janë duke shpërfillur mbingarkesën e lartë të mjekëve në punë dhe po i përbuzin mjekët”, ka deklaruar Johna.
Edhe kryetari i dytë i asociacionit Andreas Botzlar, ka paralajmëruar se durimit të mjekëve po i vije fundi.
“Mjekët kanë punuar në maksimum që nga fillimi i pandemisë Covid-19 dhe meritojnë më shumë respekt”, ka thënë ai.
Mbi 400 klinika në Gjermani kanë pezulluar punën e tyre dhe operacionet e planifikuara, duke përjashtuar urgjencat. Mjekët në Gjermani po luftojnë për përmirësimin e kushteve dhe orëve të punës, të cilat sipas tyre janë përkeqësuar gjatë gjithë pandemisë.
Sipas sindikalistëve, kjo situatë ka detyruar shumë mjekë të lënë punën në klinika dhe të hapin ordinanca të tyre private, ose të punojnë si punonjës në ndonjë qendër të kujdesit mjekësor.
Sipas asociacionit Marburger, shumë mjekë po zgjedhin kontrata me “80 për qind”, të cilat iu mundësojnë që të punojnë më pak orë dhe të bëjnë jetë më të qetë pas pandemisë.
“Kjo do të thotë që kolegët po heqin dorë nga një pjesë e pagës së tyre, në mënyrë që t’u garantohet të paktën një ditë pushimi në javë”, ka thënë Johna.
Asociacioni ka kërkuar që rritja e pagës për mjekët të jetë 5.5 për qind gjatë këtij viti, si dhe kufizime në numrin e rasteve kur një mjek mund të jetë në “gatishmëri” derisa nuk është në detyrë. /Gazeta Shneta/