Në Spitalin e Përgjithshëm të Gjilanit është mbyllur reparti i pediatrisë për shkak të infektimit të katër infermiereve me koronavirus Covid-19 dhe izolimit të pjesës tjetër të stafit.
Drejtori i Spitalit Dr. Nisret Hajrullahu ka konfirmuar lajmin për mbylljen e repartit. Ai ka thënë se kjo është bërë për sigurinë e pacientëve, shkruan Gazeta Shneta.
“Po është mbyllur reparti për shkak se janë infektuar 4 anëtarë të stafit mjekësor. Për momentin nuk kemi pas fëmijë të shtrirë në spital, ndërsa shërbimet ambulantore pacientët do t’i marrin në Qendrën Kryesore të Mjekësisë Familjare”, ka deklaruar Hajrullahu.
Ai ka thënë se pjesa tjetër e stafit të pediatrisë do të testohen sot gjatë ditës për çka shpresojnë që të rezultojnë negativ. Hajrullahu ka deklaruar se gjendja e përgjithshme në Spitalin e Gjilanit është e qetë dhe nuk kanë probleme tjera.
Mbrëmë në Gjilan janë konfirmuar 9 raste pozitive me koronavirus Covid-19. Të gjithë janë raste kontakti të infermieres së një spitali privat në Prishtinë e cila rezultoi pozitiv një ditë më parë.
Infeksioni nga infermierja e spitalit privat në Prishtinë është transmetuar edhe në spitalin e Gjilanit përmes një infermiere e cila është familjare e saj. /Gazeta Shneta/