Ministri i Shëndetësisë Arben Vitia ka deklaruar në një konferencë për media se më 27 shtator do të nis mësimi në shkolla, ndërsa ka thënë se do të lejohet puna e gastronomisë në ambiente të brendshme duke kërkuar certifikatën e vaksinës ose testet Covid-19.
Vitia ka deklaruar se sipas raporteve të Institutit Kombëtar të Shëndetit Publik, është shënuar rënie e rasteve të reja pozitive por megjithatë situata mbetet ende jostabile.
“Më 27 shtator do të fillojë mësimi në shkolla, me maksimum 20 nxënës në klasë. Gastronomia do të lejohet të punojë në ambiente të brendshme, por do të kërkohet certifikata e vaksinimit ose testet negative Covid-19. E njëjta vlen edhe për qendrat tregtare dhe call center”, ka deklaruar Vitia.
Ai ka bërë të ditur poashtu se në aktivitetet sportive në ambiente të mbyllura do të lejohet prania e qytetarëve në vetëm 10 për qind të kapacitetit duke kërkuar certifikatën e vaksinës apo testet Covid-19. Ndërsa në ambiente të hapura lejohet 30 për qind e kapacitetit, por duke kërkuar kriteret e njëjta si më sipër. E njëjta vlen edhe për aktivitetet kulturore.
Vitia ka bërë të ditur se deri më tani në Kosovë janë vaksinuar me një dozë 41 për qind e qytetarëve ndërsa me dy doza 26 për qind. /Gazeta Shneta/