Pas lindjes së një fëmije, rikthimi i menstruacioneve ndodh sipas ritmit të trupit tuaj dhe nuk ka një afat të caktuar. Nëse ushqeni foshnjën me gji, cikli mund të mos rikthehet për disa muaj, madje në disa raste edhe për vite. Ndërsa nëse përdoret formulë artificiale, menstruacionet shpesh kthehen më shpejt pas lindjes.
Koha e rikthimit ndikohet nga mënyra e ushqyerjes së foshnjës. Menstruacionet kanë më shumë gjasa të kthehen kur foshnja ushqehet më rrallë me gji, fillon të flejë më gjatë gjatë natës, merr ushqime të ngurta ose përdoren edhe biberonë me formulë. Kjo ndodh sepse ndryshimet hormonale të lidhura me gjidhënien ndikojnë drejtpërdrejt në ovulacion dhe fertilitet.
Kur menstruacionet rikthehen, ato mund të jenë të parregullta në fillim, sidomos nëse vazhdoni gjidhënien. Mund të ndodhë të humbisni një cikël ose të kalojnë disa muaj deri në ciklin tjetër. Me zvogëlimin gradual të gjidhënies, cikli zakonisht stabilizohet, shkruan burimi PregnancyBirthBaby.org.au transmeton Gazeta Shneta.
Ndryshimet hormonale gjatë menstruacioneve mund të ndikojnë edhe në furnizimin me qumësht, pasi foshnja mund të kërkojë të ushqehet më shpesh. Zakonisht, disa ushqyerje shtesë në ditë janë të mjaftueshme për ta rritur sërish prodhimin e qumështit.
Është e rëndësishme të dini se mund të mbeteni shtatzënë edhe gjatë gjidhënies, pasi ovulacioni mund të ndodhë para rikthimit të ciklit. Për këtë arsye rekomandohet përdorimi i metodave të sigurta kontraceptive, si spirale, implanti hormonal ose pilulat vetëm me progesteron, pas konsultimit me mjekun.
Nëse keni gjakderdhje të pazakontë, dhimbje të forta apo ndryshime të mëdha në cikël, këshillohet të flisni me mjekun ose specialistin e gjidhënies për vlerësim dhe këshilla të përshtatura. /Gazeta Shneta/