Sipas Federatës Ndërkombëtare të Diabetit, rreth një në nëntë të rritur në botë ka diabet, dhe 90% e rasteve janë të tipit 2. Ndërsa nuk ka një kurë për këtë formë të diabetit, gjendja mund të menaxhohet përmes stilit të shëndetshëm të jetesës – përfshirë aktivitetin fizik – dhe përmes medikamenteve.
Metformina, e miratuar nga FDA në vitin 1994, konsiderohet trajtimi i parë për diabetin e tipit 2 dhe përdoret gjerësisht në mbarë botën, shkruan burimi Medical News Today transmeton Gazeta Shneta.
Si ushtrimet fizike, ashtu edhe metformina dihet se rrisin ndjeshmërinë ndaj insulinës dhe ofrojnë mbrojtje të rëndësishme për shëndetin metabolik dhe kardiovaskular. Megjithatë, studiuesit ende po përpiqen të kuptojnë nëse këto dy qasje funksionojnë harmonikisht kur kombinohen.
Profesori Steven Malin nga Universiteti Rutgers shpjegon se kjo është me rëndësi, pasi shumica e pacientëve këshillohen të marrin metforminë dhe të ushtrohen rregullisht.
Por studimi i ri që ai drejtoi, i botuar në “The Journal of Clinical Endocrinology & Metabolism”, sugjeron se metformina mund të zbehë disa nga përmirësimet që sjell zakonisht aktiviteti fizik.
Konkretisht, rezultatet tregojnë se metformina mund të kufizojë rritjen e funksionit të enëve të gjakut dhe kontrollin e sheqerit në gjak që zakonisht vërehen tek personat që stërviten rregullisht. Kjo do të thotë se edhe pse ushtrimet mbeten thelbësore për menaxhimin e diabetit të tipit 2, ndërveprimi i tyre me metforminën mund të mos jetë gjithmonë optimal.
Studiuesit theksojnë nevojën për kërkime të mëtejshme për të kuptuar më mirë se si duhet balancuar trajtimi me metforminë dhe programet e aktivitetit fizik, në mënyrë që pacientët të përfitojnë maksimalisht nga të dyja. /Gazeta Shneta/