Më shumë se një e treta e personave që kanë kaluar infeksionin me COVID-19 zhvillojnë të ashtuquajturin “COVID i zgjatur”, një gjendje kronike që zgjat të paktën tre muaj pas infektimit fillestar. Aktualisht nuk ekziston një kurë specifike për COVID-in e zgjatur dhe vaksinimi kundër kësaj sëmundje konsiderohet mënyra më e mirë për t’u mbrojtur nga kjo gjendje.
Sipas një punimi të ri shkencor, marrja e një ilaçi të zakonshëm për diabetin, metformina, gjatë ose menjëherë pas infektimit me virusin SARS-CoV-2, mund të ndihmojë në parandalimin e zhvillimit të COVID-it të zgjatur. Ky virus është shkaktari kryesor i sëmundjes COVID-19.
COVID-i i zgjatur shoqërohet me simptoma të ndryshme, si lodhje ekstreme, mjegullim mendor (brain fog), probleme me frymëmarrjen, rrahje të shpejta të zemrës, si dhe dhimbje të kyçeve dhe muskujve, shkruan burimi Medical News Today transmeton Gazeta Shneta.
Studime të mëparshme tregojnë se kjo gjendje mund të çojë në komplikacione serioze shëndetësore, përfshirë sindromën e takikardisë posturale (POTS), goditje në tru, fibromialgji, çrregullime ankthi, sindromën e lodhjes kronike dhe sëmundje kronike të veshkave.
Trajtimi i COVID-it të zgjatur fokusohet kryesisht në menaxhimin e simptomave, mbështetjen e shëndetit mendor dhe terapi të ndryshme fizike ose respiratore. Për shkak se kushdo mund ta zhvillojë këtë gjendje, vaksinimi mbetet masa kryesore parandaluese.
Studimi i botuar në revistën “Clinical Infectious Diseases”, bazohet në të dhëna nga prova klinike të randomizuara dhe regjistra elektronikë shëndetësorë.
Sipas studiuesve, mekanizmat e veprimit të metforminës kanë treguar më herët se mund të ulin ngarkesën virale të disa viruseve, çka e bën atë një kandidate premtuese edhe për SARS-CoV-2.
Për më tepër, metformina njihet për tolerancë të mirë, kosto të ulët dhe siguri të lartë, duke përfshirë edhe përdorimin te gratë shtatzëna. /Gazeta Shneta/