Nga viti 2016 deri në 2024, niveli i mikroplastikave në mostrat e trurit të analizuar është rritur me 50 përqind.
Mikroplastika po depërton në trurin tonë me pasoja të panjohura për shëndetin e njeriut, ka zbuluar një studim i ri – raporton Euronews Health përcjell Gazeta Shneta.
Çdo ditë, njerëzit thithin, hanë dhe pinë copëza të vogla plastike të njohura si mikroplastika dhe nanoplastika.
Shkencëtarët kanë dyshuar prej kohësh se ato mund të kalojnë barrierën gjak-tru, e cila vepron si një filtrë midis sistemit nervor qendror dhe pjesës tjetër të trupit, duke mbrojtur trurin nga substancat toksike dhe duke i siguruar atij lëndë ushqyese.
Studimi i publikuar në revistën “Nature Medicine”, është i fundit që sugjeron se ato mund të kalojnë barrierën gjak-tru.
Kërkuesit nga Universiteti i New Mexico-s në SHBA analizuan mostra post-mortem nga 52 trupa njerëzish, përfshirë 28 që ishin në autopsi në vitin 2016 dhe 24 mostra nga viti 2024. Ata gjetën mikroplastika në çdo mostër truri – dhe një koncentrim 50 përqind më të lartë në vitin 2024 se sa në vitin 2016.
Ata gjithashtu identifikuan nivele më të larta mikroplastikash në tru se sa në organe të tjera si veshka dhe mëlçia.
Mikroplastikat duken se po kalojnë barrierën gjak-tru
“Dëshmitë shkencore që dokumentojnë ndotjen nga plastika në çdo matricë të mundshme po grumbullohen, kështu që fatkeqësisht nuk jam më e befasuar kur e shoh këtë,” tha Bethanie Carney Almroth, ekotoksikologe që studion efektet mjedisore të plastikës në Universitetin e Goteborgut, për Euronews Health.
Mikroplastikat janë identifikuar më parë në gjak, mushkëritë, placenta dhe qumështin e gjirit të njeriut.
Por “ideja që grimcat … mund të kalojnë barrierën gjak-tru është shqetësuese,” tha Almroth, e cila nuk ishte e përfshirë në studimin e ri.
Kërkuesit ende nuk e dinë saktësisht se si – ose sa shumë – mikroplastikat ndikojnë në rezultatet e shëndetit. Studime të tjera kanë identifikuar lidhje të mundshme me probleme serioze, përfshirë disa lloje të kancerit, probleme me frymëmarrjen, sulme në zemër dhe sëmundje inflamatore të zorrëve.
Studimi i ri ofron një tjetër dëshmi. Kërkuesit studiuan trurin e 12 personave që kishin demencë dhe gjetën një koncentrim më të lartë mikroplastikash në trurin e tyre sesa te njerëzit pa diagnozë. /Gazeta Shneta/