Drejtori i Shërbimit Spitalor Klinik Universitar të Kosovës, Dr. Basri Sejdiu, ka raportuar sot para Komisionit për Mbikëqyrjen e Financave Publike për Pasqyrat Vjetore Financiare për vitin 2016.
Në Komision ishte ftuar edhe ministri i Shëndetësisë, Uran Ismaili, por i njëjti mungoi dhe në vend të tij u paraqit Ud. i Sekretarit të Përgjithshëm. Kryesuesi i Komisionit, deputeti i LDK-së Driton Selmanaj, tha se janë vetëm bartësit e institucioneve që mund të raportojnë dhe kësisoj raportimi për MSH-në u shty për një ditë tjetër.
Deputetët kanë dhënë disa vërejtje për Shërbimin Spitalor Klinik Universitar, kryesisht të bazuara në Raportin e Zyrës Kombëtare të Auditimit, shkruan Gazeta Shneta.
Deputeti Mërgim Lushtaku theksoi se SHSKUK ka bërë servisimin e pajisjeve në vlerë mbi 1 milion euro, para këto të dedikuara për investime kapitale.
Ai shtoi se SHSKUK ka realizuar nivel të ulët të rekomandimeve të ZKA-së, kur ka përmbushur vetëm 2 sosh.
Lushtaku shtoi tutje se ky institucion ka mangësi në menaxhimin e kujdestarive, mbajtjen e pozitave udhëheqëse me ushtrues detyre tash e dy vite, si dhe avancimin e stafit me koeficient pa i futur fare në procedurat e konkursit.
Deputetët e VV-së, Shqipe Pantina dhe Faton Topalli, ngritën dyshime për keqpërdorimin e barnave, në mungesë të evidentimit të tyre dhe përgjegjësisë së zyrtarëve.
Pantina theksoi se në QKUK mjekët iu përshkruajnë pacientëve barna për blerje, të cilat janë në Listën Esenciale. Ajo kërkoi më shumë përgjegjësi për evidentimin e stokut të barnave, që sipas saj, nuk dihet nëse barnat shkojnë deri tek pacientët.
Dr. Basri Sejdiu, Ud i drejtorit të Përgjithshëm të SHSKUK-së, tha se janë duke punuar që t’i përmbushin rekomandimet e Auditorit, si dhe të evitojnë mangësitë e gjetura.
Ai tha se buxheti për servisimin e pajisjeve është kategorizuar si investim kapital dhe për këtë kanë dhënë vërejtjet e tyre tek Auditori për Ministrinë e Financave.
Sejdiu poashtu tha se mungesa e Sistemit të Informimit Shëndetësor ka bërë që evidentimi i barnave të bëhet në mënyrë manuale, gjë që mund të shkaktojë dyshime për keqpërdorime apo mungesë menaxhimi.
Dyshimet mbi keqpërdorimin e barnave u bënë shkak për grindjen ndërmjet deputetes Pantina dhe Avdullah Hotit nga LDK. Ky i fundit kërkoi nga deputetja e VV-së që të mos hedh akuza të pabazuara në drejtim të menaxhmentit të SHSKUK-së, pasi sipas tij ata po raportonin për financa.
Pantina reagoi duke kërkuar nga Hoti që t’i disiplinojë deputetët e partisë së tij dhe të respektojë mendimin e kolegëve nga partitë tjera. Ajo poashtua ia rikujtoi se nuk është më ministër në Qeveri, që t’iu dal në mbrojtje institucioneve. /Gazeta Shneta/