Shteti gjerman edhe zyrtarisht ka nënshkruar Deklaratë të Përbashkët me Kosovën për t’i plotësuar nevojat e tyre me staf mjekësor. Ministri i Shëndetësisë Jens Spahn ka deklaruar se vendi i tij ka nevojë për 50-60 mijë infermierë dhe këtë numër do ta përmbush nga Kosova dhe vendet tjera
Ministri i Shëndetësisë Uran Ismaili ka pritur sot në një takim homologun e tij nga Gjermania Jens Spahn. Ata kanë nënshkruar një Deklaratë të Përbashkët e cila parasheh shkëmbimin e përvojave në fushën e shëndetësisë, veçanërisht përkrahjen e shtetit Gjerman në funksionalizimin dhe implementimin e Sigurimeve Shëndetësore.
Deklarata është konsideruar historike, por mbetet të shihet se cili vend do t’ia shoh hairin më shumë, Kosova apo Gjermani. Kjo për faktin se e para ka nevojë për asistencë në fushën e sigurimeve shëndetësore për çka shteti gjerman ka premtuar konsulencë. Ndërkaq Gjermania ka nevojë të madhe për infermierë dhe synon të marr numër të madh të tyre nga Kosova, shkruan Gazeta Shneta.
Këtë e ka pranuar edhe vet ministri gjerman Jens Spahn në një përgjigje për Gazetën Shneta. Ai ka thënë se vendi i tij ka nevojë për 50-60 mijë infermierë dhe këtë numër pritet ta përmbush nga Kosova dhe vende të tjera.
“Ne aktualisht kemi nevojë për 50 deri 60 mijë infermierë, këtë numër të madh mund të mbushim me njerëz të Kosovës, dhe vendeve tjera. Kosova është shteti i parë me të cilin kemi nënshkruar marrëveshje të tillë”.
Spahn ka thënë se do të jenë të gatshëm ta ndihmojnë Kosovën me përvojën e tyre duke shkëmbyer ekspertë në ndërtimin e spitaleve dhe implementimin e Sigurimeve Shëndetësore.
Në anën tjetër ministri kosovar i shëndetësisë Uran Ismaili, ka thënë se ky bashkëpunim me Gjermaninë do të mundësojë që profesionistët të certifikohen në bazë të kualitetit gjerman. “Marrëveshja përcakton një bazë të gjerë, pika e parë na mundëson të kemi bashkëpunim, shërben që kapacitetet tona njerëzore t’ju mundësojë të certifikohen në bazë të kualiteteve gjermane. Për 20 vjet nuk kemi pasur një partner për të bashkëpunuar dhe tani e kemi shtetin Gjerman”, tha Ismaili.
“Është një ditë historike për Kosovën ngase kjo është hera e parë që nënshkruajmë deklaratë të tillë me Gjermaninë. Gjermania, një ndër shtetet më të fuqishme në Evropë, është aspirata dhe pika e jonë referente për sistemin tonë shëndetësor. Kjo marrëveshje do të na ndihmojë që të zhvillojmë një sistem shëndetësor modern dhe të qëndrueshëm që i mbron qytetarët tanë nga varfëria”, ka thënë Ismaili. /Gazeta Shneta/
VIDEO Ekonomia Online