Klinika Gjinekologjike Obstetrike të Qendrës Klinike Universitare të Kosovës ka pranuar donacionin me peceta higjienike, nga kompania “Buterfly.
Ky donacion u realizua përmes UNFPA në Kosovë me angazhim edhe të OJQ “QIKAT”, përkrahur nga Zyra diplomatike belge në Kosovë, iniciativë e përkrahur edhe nga Ministria e Shëndetësisë, shkruan Gazeta Shneta.
Me rastin e pranimit të këtij donacioni, Ministri i Shëndetësisë, Arben Vitia, falënderoi donatorët, duke theksuar se Ministria e Shëndetësisë ka prioritet shëndetin maternal dhe se donacioni është i rëndësishëm për gratë dhe vajzat që marrin shërbime në Klinikën e Gjinekologjisë. Sipas Ministrit Vitia, do të ketë angazhim që pecetat higjienike të sigurohen në spitale dhe klinika, e pastaj në secilin institucion publik.
Julian Sassel, Shef i Zyrës Diplomatike të Mbretërisë së Belgjikës në Prishtinë, tregoi angazhimet që ka bërë Zyra që e udhëheqë për sigurimin e këtij donacioni dhe për përkrahjen që i ka dhënë kësaj iniciative.
Narqize Arënliu-Hoxhaj, zëvendësuese e drejtorit të përgjithshëm të ShSKUK-së falënderoi donatorët, duke shtuar se përkrahja dhe kontributi janë të çmuara dhe kanë një ndikim të madh në përmirësimin e shëndetit dhe mirëqenies së grave.
Ministrinë e Shëndetësisë dhe donatorët i falënderoi edhe Zef Ndrejaj, drejtor i Klinikës Obstetrike Gjinekologjike, i cili vlerësoi lart punën e bërë nga Ministria e Shëndetësisë për përmirësim të kushteve të trajtimit të pacientëve në klinikë, përderisa falënderoi edhe donatorët për këtë donacion që do të jetë i mirëseardhur për pacientet që trajtohen në këtë klinikë.
Për krejt iniciativë foli edhe Visare Mujko- Nimani, shefe e Zyrës së UNFPA në Kosovë, e cila tregoi angazhimet e vazhdueshme të UNFPA për shëndetin riprodhues dhe shëndetin e vajzave dhe grave në veçanti.
Edhe Leonita Molliqaj nga OJQ “ QIKAT”, tregoi angazhimet që kanë bërë si OJQ për të hiqet TVSH për peceta higjienike, por edhe për sigurimin e tyre në përgjithësi për të gjitha vajzat dhe gratë, duke e vlerësuar si të qëlluar dhurimin e këtij donacioni./Gazeta Shneta/
