Ministria e Shëndetësisë ka njoftuar qytetarët dhe bizneset se është e ndaluar të mbahet aktiviteti i njohur si “Black Friday”.
Ky aktivitet mbahet çdo vit në të premten e fundit të muajit nëntor, gjatë të cilit qendrat tregtare, super-marketet dhe bizneset tjera ofrojnë kampanja me zbritje në produkte dhe pajisje të ndryshme.
Por për shkak se ky aktivitet tërheq grumbullim të madh të njerëzve, Ministria e Shëndetësisë ua ka përkujtuar bizneseve se me vendim të Qeverisë nuk lejohet grumbullimi i më shumë se pesë personave në hapësira publike, rrjedhimisht “Black Friday” nuk mund të mbahet në këto kushte.
Njoftimi i plotë nga MSH:
Ministria e Shëndetësisë njofton opinionin publik, por edhe qendrat tregtare dhe super-marketet se nuk ju lejohet aktiviteti i llojit “Black Friday”.
Grumbullimi i njerëzve në këtë kohë të pandemisë është i ndaluar edhe me vendime të Qeverisë së Republikës së Kosovës.
Në bazë të vendimit të fundit të Qeverisë për masa të reja për mbrojtjen nga COVID-19, ndalohet grumbullimi i më shumë se pesë personave në hapësira publike, prandaj obligohet Policia e Kosovës dhe inspektoratet përgjegjëse të mbikëqyrin zbatimin e masave dhe vendimeve të tjera në zbatimit të Ligjit Nr.07/L-006 për Parandalimin dhe Luftimin e Pandemisë në territorin e Republikës së Kosovës.
Për shkelësit e masave, organet kompetente obligohen të shqiptojnë masat ndëshkimore sipas Ligjit Nr. 07/l-006 për Parandalimin dhe Luftimin e Pandemisë Covid-19 në territorin e Republikës së Kosovës.
Andaj MSh kërkon nga organet e rendit dhe inspektoratet që të jenë në krye të detyrës dhe kudo që hasin në organizime të tilla, të marrin masa në bazë të vendimeve në fuqi.
Qytetarëve u bëjmë thirrje ë t’i shmangën grumbullimet e panevojshme dhe pjesëmarrjen në aktivitete të ndaluara në interes të ruajtjes së shëndetit të tyre.
Masat dhe vendimet anti Covid duhet të respektohen nga çdo kush dhe në çdo kohë. Kudo që haset në shkelje të masave, organet kompetente të ndërmarrin masa.