Deputetët e Kuvendit të Kosovës kanë miratuar në lexim të dytë Projektligjin për sigurimin e detyrueshëm të kujdesit shëndetësor.
Projektligji u miratua me 80 vota për, asnjë kundër dhe asnjë abstenim.
Gjatë debatit, deputetët nga partitë opozitare vunë në pah se ka shumë paqartësi lidhur me këtë ligj.
“Është një ligj që qëllimin e ka në fund me thanë e kemi ligjin, e zbatimin qysh ka fillu ligji ndoshta pas një dekade edhe zbatohet”, tha deputeti i PDK-së, Uran Ismaili.
Edhe nga LDK thanë se ky ligj nuk duhet të trajtohet në procedurë të përshpejtuar.
“Fatkeqësisht mënyra si është trajtuar këto ditë në mes të seancës së parë dhe të seancës së sotme në mënyrë të shpejtuar, pa mundësi për debat publik. Kjo qasje shkel e shko jo vetëm që nuk e funksionalizon këtë ligj, por dëmton edhe besimin e qytetarëve dhe vet përpjekjet për të ndërtuar një shëndetësi të zhvilluar dhe të qëndrueshme”, tha deputeti i LDK-së, Armend Zemaj.
Shqyrtimi i parë i këtij projektligji ishte bërë më 10 prill.