Mirënjohje për motrat të cilat kontribuuan mbi 45 vite në shëndetësi (Foto)

2017-05-11 në ora 10:20

Në Ditën Ndërkombëtare të Infermierisë, Komuna e Prishtinës u ka ndarë mirënjohje 15 motrave medicinale për kontributin e tyre në shëndetësi për rreth 45 vite.

Iniciatorja e kësaj ngjarje, asamblistja Kimete Zeqa, tha se të gjithë duhet të jemi falënderues për kontributin e motrave, të cilat kanë punuar në kushte të vështira, shkruan Gazeta Shneta.

Duke folur për punën rreth 45-vjeçare të infermiereve, Zeqa tha se duhet të merret shembull nga to dhe të përmirësohen shërbimet nga motrat medicinale në ditët e sotme.

“Komunikimi duhet të jetë më në nivel. Një buzëqeshje me pacientin është ilaç. Një fjalë e mirë është ilaç. Është pa pare. Pse mos ta bëjmë këtë. Pacienti ka të drejt të ankohet sepse kudo që shkon është shtëpia e tij”, ka deklaruar Zeqa.

Drejtori i Drejtoratit të Shëndetësisë në komunë, Arben Vitija, konsideron se infermieret janë shtylla kryesore e sistemit shëndetësor në secilën shoqëri.

“Është profesion hyjnor sepse me fjalët e mira, shëroni shpirtin e pacientin”.

“Ju jeni ato që i keni dhënë baza infermierisë në Kosovë. Nëse dikush mundet me ndryshu përceptimin karshi shëndetësisë në Kosovë, munden vetëm infermieret”, ka deklaruar Vitija.

Fetije Huruglica nga Ministria e Shëndetësisë, tha se duhet të jemi mirënjohëse për punën e këtyre grave, sidomos në kushtet në të cilat kanë punuar.

“Urojmë që puna juaj të jetë udhërrëfyese për infermieret e reja”, është shprehur ajo. /Gazeta Shneta/