Vitin e kaluar ministri i Shëndetësisë Uran Ismaili dhe drejtori i SHSKUK-së Dr. Basri Sejdiu, nënshkruan një marrëveshje bashkëpunimi me qendrën “Princes Maxima” në Holandë ku trajtohen fëmijët e sëmurë me kancer.
Në këtë marrëveshje ishte paraparë sjellja e mjekëve dhe ekspertëve holandezë në QKUK, për të trajnuar personelin mjekësor të Kosovës. E këta mjekë holandezë pritet të vijnë më 29 dhe 30 prill, ka njoftuar ministri Ismaili, shkruan Gazeta Shneta.
“Vitin e kaluar në Holandë nënshkruam një marrëveshje shumë të rëndësishme bashkëpunimi me qendrën më të madhe në Evropë për trajtimin e fëmijëve me kancer “Princes Maxima”. Tani, me 29 dhe 30 prill, mjekët dhe ekspertët e kësaj qendre do të vijnë në Kosovë për të nisur trajnimet për stafin tonë mjekësor dhe zhvillimin e programeve të diagnostifikimit bazuar në praktikat më të mira në Evropë. Përmes diagnostifikimit dhe trajtimit më të mirë të kohës ne do të rrisim cilësinë e shërbimit dhe shkallën e shërimit të fëmijëve nga kjo sëmundje”, ka shkruar Ismaili në Facebook. /Gazeta Shneta/