Dhjetëra mjekë ia kanë mësyrë pozitës së drejtorit në 12 klinika të QKUK-së. Konkurrenca më e madhe pas testit me shkrim pritet të jetë në Klinikën e Kirurgjisë Maksillo-Faciale
Në konkursin për drejtorë të disa klinikave në QKUK kanë kandiduar dhjetëra mjekë. Në shumicën prej tyre konkursit i janë nënshtruar edhe Ushtruesit e Detyrës së Drejtorit që kanë mbajtur këtë pozitë tash e disa vjet. Komisioni përzgjedhës ka publikuar rezultatet e testit me shkrim i cili është mbajtur më datën 5 të këtij muaji.
Komisioni në përbërje të Dr. Fakir Spahiu – kryetar, dhe anëtarët Dr. Skender Kandic e Dr. Fatime Kokollari, kanë publikuar rezultatet e testit me shkrim për nëntë klinika, nga 12 sa ishte shpallur konkursi fillimisht, shkruan Gazeta Shneta.
Për drejtor të Klinikës së Kardiokirurgjisë me Kardiologji Invazive kanë aplikuar 5 kandidatë. Dr. Tefik Bekteshi ka arritur rezultatin më të mirë prej 78 pikëve. Bekteshi me këto pikë ka siguruar kualifikimin në intervistën me gojë. Ai nuk do të ketë konkurrencë në këtë fazë pasi asnjëri nga kundërkandidatët e tij nuk kanë arritur më shumë se 50 pikë. Artan Ahmeti ka marr 31, Adem Grbolar 18 dhe Agron Qerimi është tërhequr nga testi.
Konkurrencë e fortë pritet të zhvillohet për drejtor të Klinikës së Kirurgjisë Maksillo-Faciale. Në test kanë hyrë pesë kandidatë dhe tre prej tyre e kanë kaluar. Dr. Agron Bytyqi ka marr 79 pikë, Dr. Shkelzen Komoni 60 pikë dhe Nijazi Heta 58. Të tre do të përballen edhe në fazën e intervistës. Ndërsa Mergime Prekazi-Loxha ka marr 20 pikë dhe Arsim Kelmendi 18.
Pozitës së drejtorit të Kirurgjisë Torakale ia kanë mësyrë 4 kandidatë, por vetëm dy prej tyre kanë hyrë në test. Dr. Saudin Maliqi me 71 pikë dhe Dr. Fitim Selimi me 52 pikë do të sfidohen edhe njëherë nga Komisioni me intervistë, për t’u përzgjedhur njëri nga ta në fund.
Për Klinikën e Neonatologjisë ka pasur pak interesim pasi vetëm Dr. Xhevdet Gojnovci ka hyrë në test, nga tre veta sa kishin konkurruar në fillim. Gojnovci ka marr 75 pikë në testin me shkrim. Njëjtë ka ndodhur edhe në Klinikën e ORL-së ku Dr. Hajdin Thaçi është poentuar me 56 pikë.
Konkursi do të përsëritet në Klinikën e Neurologjisë pasi aty nuk ka arritur ta kalojë testin as drejtori që ka udhëhequr deri më tani, Dr. Nexhmedin Shala. Ai ka marr vetëm 41 pikë në test, ndërsa Rushit Jashari 22 dhe Valdet Bajraktari 20 pikë.
Për pozitën e drejtorit të Klinikës së Psikiatrisë në intervistë kanë shkuar Dr. Shaban Mecinaj dhe Dr. Nazmie Ibishi-Musliu. Mecinaj ka fituar 68 pikë në test ndërsa Ibishi-Musliu 10 më pak.
Klinika e Pulmologjisë mund të bëhet me drejtoreshë të re pasi ushtruesja e detyrës Dr. Iliriana Raça-Bunjaku nuk ka arritur ta kalojë testin me shkrim duke marr vetëm 41 pikë. Ndërsa Dr. Rukije Mehmeti ka fituar të drejtën për intervistë pasi ka rezultuar me 65 pikë nga testi me shkrim.
Rezultatet e testit me shkrim janë publikuar edhe për konkursin për drejtor të Klinikës së Institutit të Psikiatrisë Forenzike. Me rezultate pozitive ka dal veç një kandidatë, Gani Halilaj me 57 pikë, ndërsa Fahri Drevinja dhe Shpend Haxhibeqiri nuk kanë kaluar testin. /Gazeta Shneta/